बझाङ- केदारस्यूँ गाउँपालिका अध्यक्ष गणेशबहादुर बोहराले जेन-जी आन्दोलनलाई जनताको प्रतिनिधित्व गर्ने सभ्य र लोकतान्त्रिक आन्दोलनका रूपमा व्याख्या गरेका छन्। उनले आफ्नो सामाजिक सञ्जाल फेसबुकमार्फत “जेन-जीको छोटो समीक्षा” शीर्षकमा लेख सार्वजनिक गर्दै आन्दोलन बाह्य हस्तक्षेपका कारण हिंसात्मक बनेको र त्यसबाट राष्ट्रले ठूलो क्षति बेहोर्नु परेको उल्लेख गरेका छन्।
उनले , आन्दोलनमा ७२ जनाले ज्यान गुमाए भने हजारौं घाइते भए लेखेका छन् । साथै सिंहदरबार, सर्वोच्च अदालत, संसद भवनलगायतका ऐतिहासिक संरचना तथा सार्वजनिक सम्पत्तिमा क्षति पुगेको र नेताहरू र व्यापारीहरूको व्यक्तिगत सम्पत्तिमा समेत असर परेको उनले स्मरण गराए।
अध्यक्ष बोहराले भने, “कुनै पनि सभ्य आन्दोलनलाई हिंसात्मक माध्यमबाट बिगार्ने प्रयास हाम्रो समाज र राष्ट्रका लागि गम्भीर षड्यन्त्र हो। त्यसकारण यस्ता कार्यमा संलग्न जो कोहीलाई पनि कारबाहीको दायरामा ल्याउनुपर्छ।”
जेन-जी आन्दोलन जन्माउन राजनीतिक नेतृत्वको कमजोरी प्रमुख कारण भएको उनको भनाइ छ। उनले केपी शर्मा ओलीको सत्तालोलुपता र दल फुटाउने प्रवृत्ति, शेरबहादुर देउवाको भागबण्डा र सम्झौता राजनीति, प्रचण्डको आत्मकेंद्रित निर्णय र युवा विचारसँग दूरीलाई असन्तोषको मूल कारक बताउँदै तीनै नेताको घुमीफिरी सत्ता सञ्चालनले जनता निराश बनेको टिप्पणी गरेका छन्।
उनले लेखमा जोड दिएका छन्, “जेन-जी आन्दोलन हाम्रो आँखाको आँसु हो, हाम्रो हृदयको आवाज हो, भविष्यको आशा हो, जनताको न्यायको खोजी हो।” तर, केही राजनीतिक दल, संगठन र व्यक्तिहरूले आन्दोलनलाई हिंसात्मक मोड दिएको भन्दै उनले दुःख व्यक्त गरेका छन्।
बोहराले आगामी दिनमा अपराधी जिम्मेवार ठहरिने र सत्य इतिहास उजागर हुने आशा व्यक्त गर्दै अन्तरिम सरकारले पारदर्शी, सभ्य र उत्तरदायी शासन पद्धति विकास गर्नुपर्नेमा जोड दिएका छन्। उनले अन्त्यमा लेखेका छन्, “पीडा हाम्रो भूत हुनेछ, आशा हाम्रो भविष्य हुनेछ। जेन-जी आन्दोलन हाम्रो आवाज र हाम्रो शक्ति हुनेछ।”
