प्रधानमन्त्री केपी शर्मा ओलीको पाँचदिने चीन भ्रमणले अन्तर्राष्ट्रिय जगत्मा नेपालको प्रतिष्ठा अभिवृद्धि गर्न उल्लेखनीय योगदान पुगेको परराष्ट्र मन्त्रालयले जनाएको छ।
चीन भ्रमण सम्पन्न गरी स्वदेश फर्किएपछि त्रिभुवन अन्तर्राष्ट्रिय विमानस्थलमा आयोजित कार्यक्रममा परराष्ट्र सचिव अमृतबहादुर राईले उच्चस्तरीय भेटवार्ता र भ्रमणका उपलब्धिबारे जानकारी दिँदै यस्तो बताएका हुन्। चीनका राष्ट्रपति सी चिनफिङको मैत्रीपूर्ण निमन्त्रणामा प्रधानमन्त्री ओली १४ भदौमा प्रतिनिधिमण्डलको नेतृत्व गर्दै चीन प्रस्थान गरेका थिए।
भ्रमणका क्रममा प्रधानमन्त्री ओलीले चिनियाँ राष्ट्रपति सी चिनफिङ, उपराष्ट्रपति तथा विभिन्न राष्ट्रका राष्ट्र–सरकार प्रमुखहरूसँग भेटवार्ता गरेका थिए। भ्रमणको मूल उद्देश्य चीनको तियानजिनमा सम्पन्न शाङ्घाई सहयोग सङ्गठन (एससीओ)को शिखर सम्मेलनमा सहभागिता जनाई सो सङ्गठनमा नेपालको भूमिकालाई सुदृढ बनाउनु रहेको मन्त्रालयले जनाएको छ।
प्रधानमन्त्री ओलीले राष्ट्रपति सीसँग तियानजिनमा भएको भेटमा द्विपक्षीय सम्बन्ध, सहयोग र प्राथमिकताका विषयमा खुला र हार्दिकतापूर्ण छलफल गरेका थिए। उनले शान्तिपूर्ण सहअस्तित्वका पाँच सिद्धान्तमा आधारित नेपाल–चीन सम्बन्ध समस्यारहित रहेको उल्लेख गर्दै नेपालप्रति देखाएको निरन्तर सहयोगका लागि धन्यवाद व्यक्त गरेका थिए। साथै, एससीओमा नेपालको पूर्ण सदस्यताको समर्थन गर्न आग्रह गरेका थिए।
प्रधानमन्त्री ओलीले बेल्ट एन्ड रोड इनिसिएटिभ (बीआरआई) अन्तर्गतका परियोजनाको शीघ्र कार्यान्वयनमा आशा व्यक्त गर्दै रासायनिक मल, पेट्रोलियम अन्वेषण, मानव स्रोत विकास, जलवायु परिवर्तनको असर न्यूनीकरण तथा जनस्तरको सम्बन्ध सुदृढीकरणका क्षेत्रमा सहयोगका लागि चीनसँग अनुरोध गरेका थिए।
