काठमाडौं – कैलालीका प्रमुख जिल्ला अधिकारी (सीडीओ) गोगनबहादुर हमाललाई गृह मन्त्रालयले पदबाट फिर्ता बोलाएको छ।
गएको साउन २३ गते शुक्रबार राति कैलाली कारागारमा भएको झडपमा एक जनाको मृत्यु र ४८ जना कैदीबन्दी घाइते भएपछि सुरक्षा समन्वयमा कमजोरी देखिएको ठहर गर्दै बुधबार हमाललाई मन्त्रालय तानिएको हो।
गृह मन्त्रालय स्रोतका अनुसार, हमालको स्थानमा दाङका सीडीओ कृष्णप्रसाद लम्साललाई कैलाली पठाइएको छ।
झडपका क्रममा लागुऔषध मुद्दामा कैद भुक्तान गरिरहेका भरत चौधरीको मृत्यु भएको थियो। कैदीबन्दी आक्रामक बनेपछि दुई दिनसम्म कारागारमा तनावपूर्ण अवस्था रह्यो। मानव अधिकार आयोगको टोलीले पनि कारागार निरीक्षण गरेको थियो।
उक्त घटनामा चौधरीमाथि आक्रमण गर्ने कैदीबन्दीको पहिचान गरी कारबाहीको माग गर्दै मृतकको परिवारले जिल्ला प्रहरी कार्यालयमा जाहेरी दर्ता गरेको छ।
