काठमाडौँ- प्रधानमन्त्री केपी शर्मा ओली सहभागी स्पेनको कार्यक्रममा अन्य नेपालीलाई पठाउने गिरोहबारे गृहमन्त्री रमेश लेखकले छानबिन गर्न निर्देशन दिएका छन्।
सोमबार बिहान गृहसचिव गोकर्णमणि दुवाडी र प्रहरी महानिरीक्षक दीपक थापालाई अनुसन्धान गर्न निर्देशन दिँदै गृहमन्त्री लेखकले विषय गम्भीर भएको बताएका छन्।
राष्ट्रिय स्वतन्त्र पार्टीकी सांसद सोविता गौतमले प्रधानमन्त्री बाहेक अन्य ५५ जना नेपाली सो कार्यक्रममा सहभागी भएर स्पेन गएका तर नफर्किएको भन्दै नाम र केही कागजात सार्वजनिक गरेकी थिइन्।
गृहमन्त्रीको सचिवालयका अनुसार ती व्यक्तिहरू कसरी गएका थिए, भिसालगायत प्रक्रिया कसरी मिलाइएको थियो भन्नेबारे सीआईबी र मानव बेचविखन अनुसन्धान ब्युरोमार्फत अनुसन्धान थालिनेछ।
गृह मन्त्रालयले प्रधानमन्त्रीको टोलीबाहेक अन्य कसले, कसरी र कुन प्रयोजनका लागि स्पेन यात्रा गरे भन्नेबारे विस्तृत छानबिन गर्ने जनाएको छ।
