काठमाडौं- जल तथा मौसम विज्ञान विभागको मौसम पूर्वानुमान महाशाखाले हाल देशभर मनसुनी वायु सक्रिय रहेको जनाएको छ । महाशाखाका अनुसार मनसुनको न्यून चापीय रेखा पूर्वतर्फ सरदर स्थानको आसपास र पश्चिमतर्फ सामान्यभन्दा अलि उत्तरमा रहेको छ, जसका कारण देशका पहाडी तथा केही तराई क्षेत्रहरूमा वर्षाको सम्भावना देखिएको हो।
हाल देशका पहाडी भूभागहरूमा सामान्य बदली रहेको छ भने बाँकी भूभागहरूमा आंशिक बदली देखिएको छ। केही पहाडी क्षेत्रमा मेघगर्जन र चट्याङसहित हल्का वर्षा भइरहेको महाशाखाले जनाएको छ।
दिउँसोको पूर्वानुमानअनुसार बागमती, गण्डकी र सुदूरपश्चिम प्रदेशका पहाडी भूभागका केही स्थानहरूमा तथा अन्य प्रदेशका थोरै स्थानहरूमा मेघगर्जनसहित हल्कादेखि मध्यम वर्षाको सम्भावना छ। साथै, बागमती, गण्डकी, लुम्बिनी, कर्णाली र सुदूरपश्चिम प्रदेशका एकदुई स्थानहरूमा भारी वर्षा पनि हुन सक्ने जनाइएको छ।
रातिको पूर्वानुमानअनुसार कोशी, मधेश, बागमती र गण्डकी प्रदेशका केही स्थानहरूमा र अन्यत्र थोरै स्थानहरूमा मेघगर्जनसहित हल्कादेखि मध्यम वर्षा हुने सम्भावना छ। साथै, कोशी, मधेश र बागमतीका एकदुई स्थानमा भारी वर्षाको चेतावनी दिइएको छ।
महाशाखाका अनुसार उच्च पहाडी तथा हिमाली भूभागहरूमा समेत हल्कादेखि मध्यम वर्षा र हिमपातको सम्भावना छ।
सतर्क रहन आग्रह
महाशाखाले सम्भावित वर्षाका कारण भूक्षय, बाढी, पहिरो र गेग्रान बहावको जोखिम रहन सक्ने जनाएको छ। विशेषगरी शहरी र तराई क्षेत्रहरूमा डुबानको जोखिम, नदी-नालामा पानीको सतह वृद्धि, कृषि, स्वास्थ्य, पर्यटन, निर्माण कार्य, सडक तथा हवाई यातायातमा असर पर्न सक्ने भएकाले आवश्यक सतर्कता अपनाउन अनुरोध गरेको छ।
