बझाङ जिल्लाको सुर्मा गाउँपालिका–१, दौलिचौरमा निर्माण सम्पन्न भएको नयाँ प्रहरी चौकी भवनको एक विशेष समारोहबीच उद्घाटन गरिएको छ।
प्रहरी सेवामा पहुँच विस्तार र जनमैत्री सुरक्षालाई थप सुदृढ गर्न नेपाल सरकार र सुर्मा गाउँपालिकाको संयुक्त आर्थिक सहयोगमा निर्माण गरिएको उक्त भवनको उद्घाटन प्रमुख जिल्ला अधिकारी कैलाश ठकुराठीले रिवन काटेर गर्नुभएको हो। गाउँपालिका अध्यक्ष खडक बोहराले कार्यक्रमको औपचारिक शुभारम्भ ब्यानर वाचन गरेर गर्नुभयो।
उद्घाटन कार्यक्रममा प्रमुख जिल्ला अधिकारी तथा सुरक्षा संयोजकको अध्यक्षता रहेको थियो। कार्यक्रममा प्रमुख अतिथि गाउँपालिका अध्यक्ष खडक बोहरा तथा विशिष्ट अतिथिका रूपमा वडा नं. १ का अध्यक्ष दिनेश बोहरा, वडा नं. २ का अध्यक्ष सुरेन्द्र बोहरा, अन्य जनप्रतिनिधि, सुरक्षाकर्मीहरू र स्थानीय बासिन्दाहरूको उल्लेख्य उपस्थिति थियो।
कार्यक्रममा सशस्त्र प्रहरी डिएसपी युवराज भण्डारीले प्रहरी चौकीको उद्देश्य, सेवा प्रवाह तथा आगामी योजनाबारे जानकारी गराउनुभयो। उहाँले स्थानीय सरकारसँग सहकार्य गर्दै जनताको सुरक्षामा प्रहरी कटिबद्ध रहेको बताउनुभयो।
गाउँपालिकाले कार्यक्रमअन्तर्गत “गुनासो सुनुवाइ र सार्वजनिक बहस” पनि सञ्चालन गरेको थियो, जसमा स्थानीय प्रशासन र नागरिकबीच आपसी समन्वय, पारदर्शिता र उत्तरदायित्वका विषयमा छलफल भएको थियो।
स्थानीय तह र सुरक्षाप्रशासनबीचको सहकार्यबाट सुन्दर सुर्माको शान्ति सुरक्षा अझ सुदृढ हुने विश्वास व्यक्त गरिएको छ।
