बझाङ— बझाङको केदारस्यूँ गाउँपालिका–३, मैतोलीको पहिरो प्रभावित क्षेत्रमा बृहत वृक्षारोपण गरिएको छ । दलित सहयोग समाज र वर्ल्ड भिजन इन्टरनेशनल नेपालको साझेदारीमा सञ्चालित पोषण तथा उत्थानशील जीविकोपार्जन परियोजनाअन्तर्गत सम्पन्न कार्यक्रममा २५ हजार भेटिभरसहित ३ हजारभन्दा बढी बिरुवा रोपिएको हो।
वृक्षारोपण कार्यक्रम दलित सहयोग समाजको नेतृत्वमा तथा केदारस्यूँ गाउँपालिका, जिल्ला प्रशासन कार्यालय, डिभिजन वन कार्यालय र कृषि ज्ञान केन्द्रको समन्वयमा सम्पन्न भएको हो।
कार्यक्रम अन्तर्गत २५ हजार भेटिभर बिरुवासँगै बाँस ६००, पीपल २००, बैँस ३००, कोइरालो ३००, अमला ५०, लालुपाते ५०, कपुर ५०, सल्ला ५०, रिठा ३०० र किम्बु १५० गरी करिब ३ हजार अन्य बिरुवाहरू रोपिएको दलित सहयोग समाजले जानकारी दिएको छ।
कार्यक्रमको अध्यक्षता केदारस्यूँ गाउँपालिका अध्यक्ष गणेश बोहराले गर्नुभएको थियो। कार्यक्रममा प्रमुख जिल्ला अधिकारी कैलाश बहादुर ठकुराठी, डिभिजन वन कार्यालय प्रमुख सम्भु प्रसाद तिवारी, कृषि ज्ञान केन्द्र प्रमुख खेमराज पनेरु, सशस्त्र प्रहरी डिएसपी दुर्गा प्रसाद भट्ट, नेपाल प्रहरी डिएसपी युवराज भण्डारी, राष्ट्रिय अनुसन्धान विभागका डिएसपी भगिरथ बहादुर चन्द र पत्रकार महासंघ अध्यक्ष डि.बि. बिष्ट विशिष्ट अतिथिका रूपमा सहभागी भएका थिए।
वृक्षारोपण कार्यक्रममा बोल्दै गाउँपालिका अध्यक्ष बोहराले पहिरो जोखिम न्यूनीकरण र हरियाली प्रवर्द्धनका लागि वृक्षारोपण अभियान ऐतिहासिक भएको बताउँदै भने,
“यस्तो कार्यक्रमले वातावरण संरक्षणसँगै जनजीविकामा समेत सकारात्मक असर पार्नेछ।”
यस्तै प्रमुख जिल्ला अधिकारी कैलाश बहादुर ठकुराठीले
“स्थानीय निकाय र संघसंस्थाबीचको सहकार्यले यति ठूलो प्रयास सम्भव भएको हो। यसले दीर्घकालीन प्रभाव पार्नेछ,” भन्दै पहिरो जोखिममा रहेका बस्तीहरूलाई यसले सुरक्षा दिने उल्लेख गरे।
डिभिजन वन कार्यालय प्रमुख सम्भु प्रसाद तिवारीले भने
“वृक्षारोपण मात्र होइन, यसको संरक्षण पनि उत्तिकै महत्वपूर्ण छ,” भन्दै प्राविधिक सहयोगका लागि तयार रहेको बताए।
उता कृषि ज्ञान केन्द्र प्रमुख खेमराज पनेरुले
“यस परियोजनाबाट सुरु भएको प्रयासले सामुदायिक सहकार्य र वातावरणीय चेतना फैलाउन योगदान पुर्याउँछ,” भने।
परियोजना संयोजक रमेश बहादुर मालीका अनुसार,
“यो वृक्षारोपण परियोजनाको एक महत्वपूर्ण अभ्यास हो, जसले दिगो वातावरण संरक्षण, आयआर्जन र समुदायको सशक्तिकरणमा योगदान पुर्याउँछ।” उनले आगामी दिनमा वृक्षारोपण क्षेत्रको नियमित अनुगमन, संरक्षण तथा सामुदायिक स्वामित्व सुनिश्चित गरिने जानकारी पनि दिए।
Advertisement
