काठमाडौँ – भारतमा जारी इन्डियन प्रिमियर लिग (आईपीएल) क्रिकेटमा पञ्जाब किङ्ग्सले रोयल च्यालेन्जर्स बेङ्गलुरुलाई ५ विकेटले हराउँदै प्रतियोगिताको पाँचौं जित दर्ता गरेको छ।
गएराति बेङ्गलुरुको घरेलु मैदानमा भएको खेलमा पञ्जाबले ९६ रनको लक्ष्य १२.१ ओभरमा ५ विकेट गुमाउँदै सहज रूपमा पूरा गर्यो।
पञ्जाबका नेहाल वाडेराले अविजित ३३ रन बनाए भने बेङ्गलुरुका जोश हेजलउडले ३ र भुवनेश्वर कुमारले २ विकेट लिए।
वर्षाले प्रभावित खेल ढिलो सुरु भएको थियो। निर्धारित २० ओभरको खेल घटाएर १४ ओभरमा झारिएको थियो। टस हारेर पहिले ब्याटिङ गरेको बेङ्गलुरुले ९५ रन मात्र बनाएको थियो।
उसको सुरुवात निकै कमजोर रह्यो – ७ विकेट गुमाउँदा मात्र ४२ रन जोडिएको थियो। त्यसपछि टिम डेविडले अविजित अर्धशतक बनाएर टोलीलाई सम्मानजनक स्कोरमा पुर्याए।
पञ्जाबका अर्शदीप सिंह, मार्को जानसेन, युजभेन्द्र चाहाल र हरप्रीत ब्रारले समान २–२ विकेट लिए।
यो जितसँगै पञ्जाबले ७ खेलमा १० अंक जोडेको छ र अंक तालिकाको दोस्रो स्थानमा उक्लिएको छ। बेङ्गलुरुले भने समान खेलमा ८ अंक जोड्दै चौथो स्थानमा छ।
आज आईपीएलमा दुई खेल हुँदैछन्:
– दिउँसो ३:४५ बजे: गुजरात टाइटन्स र दिल्ली क्यापिटल्स
– बेलुका ७:४५ बजे: राजस्थान रोयल्स र लखनउ सुपर जायन्ट्स
