बझाङ- बझाङको थलारा गाउँपालिका–८ बिस्खेतस्थित छडिभेल झरना पछिल्लो समय आन्तरिक पर्यटकको लोकप्रिय गन्तव्य बन्दै गएको छ। छडिभवानी मध्यवर्ती सामुदायिक वन उपभोक्ता समूहको संरक्षणमा रहेको यो झरना क्षेत्रमा बझाङका विभिन्न स्थानबाट मानिसहरू आउने गरेका छन्।
पर्यटकहरू झरनामा नुहाउने, फोटो र भिडियो खिच्ने, वनभोज गर्ने लगायतका गतिविधिमा रमाउने गरेका छन्। गर्मीयाममा थलारा, केदारस्यु, दुर्गाथली लगायतका पालिकाबाट दैनिक १०–२० जना पर्यटक पुग्ने गरेको स्थानीय यज्ञराज जोशीले बताए।
थलारा–८ घट्टेखेत निवासी लक्ष्मीराज जोशीका अनुसार पछिल्लो समय टाढाटाढाबाट पनि जिप र मोटरसाइकल चढेर पर्यटक आउने गरेका छन्। गाउँपालिकाको सक्रियतामा पानीको धारा, मन्दिर, प्रतिक्षालय, भिउ टावर, वनभोजका संरचना निर्माण भएपछि पर्यटकको आकर्षण बढेको हो।
वडा अध्यक्ष टिकाराज जोशीले छडिभेल झरना उत्कृष्ट गन्तव्य बन्दै गएको बताउँदै शनिबार र सार्वजनिक बिदामा पर्यटकको उल्लेख्य भिड लाग्ने जानकारी दिए। पूर्वाधार विकासका लागि गाउँपालिका र प्रदेश सरकारबाट बजेट विनियोजन भइसकेको र सडक निर्माणका लागि टेन्डर प्रक्रिया अगाडि बढेको उनले बताए।
छडिभेल झरना सदरमुकाम चैनपुरबाट करिब २५ किलोमिटर पश्चिममा पर्छ। डाडिखेत बेलमाटे चोकदेखि झरनासम्म करिब २ किलोमिटर पैदल हिँड्नुपर्छ। झरना क्षेत्र प्राकृतिक सौन्दर्यसँगै धार्मिक महत्वसमेत बोकेको छ।
स्कन्द पुराणको मानस खण्डअनुसार यहाँ संख्यश शिवको वास रहेको उल्लेख छ। महाशिवरात्रिमा भक्तजनहरू शिवको पूजा गर्न यहाँ पुग्ने गर्छन्। स्थानीयहरूले बर्तबन्धजस्ता धार्मिक कार्य पनि यहीं गर्ने गरेको वडा सदस्य ईश्वरराज जोशीले जानकारी दिए।
