सत्यराज सिंह बझाङ- नेकपा एमालेका केन्द्रीय सदस्य ऐन महरले सामाजिक संजालमा नेपालको राजतन्त्रको पुन:स्थापनालाई असम्भव र अनुपयुक्त भएकाे बताए । उनले राजतन्त्रको अस्तित्वलाई ‘आर्यघाटमा दाहसंस्कार गरिसकेको’ भन्दै वर्तमान गणतन्त्रको बिकल्पको रूपमा उन्नत र परिस्कृत गणतन्त्रको आवश्यकता रहेकाे बताएका छन् ।
महरले भने ´हाम्रो पुस्ताले राजतन्त्रको शासकीय कष्ट र पीडा भोगेको छ। जनताको अधिकार कुण्ठित गरेर तिनलाई रैति बनाइएको थियो । हामी, एक्काइसौं शताब्दिका सचेत नागरिक भएको नाताले राजतन्त्रको विरुद्ध लडिरहेका छौं। अब समय आएको छ कि हामी गणतन्त्रको उन्नति र परिस्कृत गर्न जुटौं ।
उनले हिजोको तिनकुनेको घटनामा पूर्व राजा ज्ञानेन्द्र शाहको मुख्य दोष रहेको उल्लेख गर्दै, पूर्व राजा ज्ञानेन्द्र शाहलाई सम्पूर्ण सेवासुविधा खोसेर गिरफ्तार गर्नुपर्ने बताएका छन् । महरले राजतन्त्रको पुनर्निर्माणले देशमा हिंसा, लुटपाट र जनताकाे अधिकार हननको स्थितिलाई निम्त्याएर जनतालाई फेरि अन्धकारमा फसाउँने सडयन्त्र भएकाे उल्लेख गरेका छन् ।
साथै, महरले अहिलेको युवापुस्ताले राजतन्त्रको कष्ट र दमनको अनुभव नगरेको भए पनि, उनीहरूले समाजमा हुल्लडबाज र भ्रममा परेको तत्वहरूको प्रभावबाट आफूलाई जोगाउन आग्रह गरेका छन् । राजतन्त्र पुनः फर्किन्छ भने, देशमा विकास र समृद्धिको सम्भावना समाप्त हुने उनकाे भनाई छ ।
