धनगढी- सुदूरपश्चिम प्रदेशका दुई जिल्लामा भूकम्पीय पुनर्निर्माण तथा पुनःर्स्थापना आयोजना कार्यान्वयन इकाईको उद्घाटन गरिएको छ ।
भूकम्प गएको डेढ वर्षपछि बझाङ र अछाममा भूकम्पीय पुनर्निर्माण तथा पुनः स्थापना आयोजना इकाई स्थापना गरिएको हो । राष्ट्रिय विपद् जोखिम न्यूनीकरण तथा व्यवस्थापन प्राधिकरणले स्थापना गरेका एकाइको गृहमन्त्री रमेश लेखकले शुक्रबार बझाङमा र सनिवार अछाममा उद्घाटन गरेका छन् ।
उनले भूकम्पबाट प्रभावित भएकालाई सहज ढङ्गले सेवा प्रवाह गर्ने उद्देश्यले एकाइ स्थापना भएको बताए । नव स्थापित एकाइमार्फत पीडितलाई आवास निर्माण तथा मर्मत सम्भारका काम गरिने जनाइएको छ ।
भूकम्पीय पुनर्निर्माण आयोजना कार्यान्वयन एकाइ बझाङको जयपृथ्वी नगरपालिका–९ देवलमा र अछामको जिल्ला समन्वय समितिको कार्यालय स्थापना गरिएको छ ।
इकाई कार्यालयमा प्रमुख र प्राविधिकसहित चार जना कर्मचारी रहने जनाइएको छ । पुनः स्थापना आयोजना इकाई कार्यालय आइतबार जाजरकोटमा स्थापना गर्ने कार्यतालिमा रहेको छ ।
