बझाङ, माघ २१ – बझाङ जिल्लामा कबड्डीसम्बन्धी सात दिने रेफ्री तालिम सञ्चालन गरिएको छ। जिल्ला खेलकुद विकास समिति बझाङको आयोजनामा सदरमुकाम चैनपुरस्थित समन्वय समिति सभाहलमा तालिम आजदेखि माघ २७ गतेसम्म चल्ने छ।
तालिम उद्घाटन केदास्यु गाउँपालिका अध्यक्ष गणेश बोहराले पानसमा बत्ती बालेर गर्नुभएको थियो। उहाँले खेल क्षेत्रको विकासका लागि स्थानीय सरकार कुनै कमजोरी नगर्ने प्रतिबद्धता व्यक्त गर्नुभएको छ। साथै, खेलकुद क्षेत्रलाई अघि बढाउन आवश्यक सम्पूर्ण सहयोग गर्ने बताउनुभयो।
कार्यक्रम जिल्ला खेलकुद विकास समिति अध्यक्ष पुष्पलाल रोकाया ज्वालाको अध्यक्षतामा सम्पन्न भएको थियो। कार्यक्रममा केदास्यु गाउँपालिका अध्यक्ष गणेश बोहरा, सहायक प्रमुख जिल्ला अधिकारी सत्यकुमारी जोशी, अन्तर्राष्ट्रिय रेफ्री रमेश चन्द ओझा लगायत प्रशिक्षक तथा खेलप्रेमीहरूको उपस्थिति थियो।
जिल्ला खेलकुद विकास समिति अध्यक्ष पुष्पलाल रोकायाले पछिल्लो समय सरकार र खेलकुदबीच राम्रो सहकार्य हुँदै आएको उल्लेख गर्दै यस तालिमले जिल्लामा खेल क्षेत्रको विकासमा महत्वपूर्ण योगदान दिने विश्वास व्यक्त गर्नुभयो। तालिम अन्तर्राष्ट्रिय प्रशिक्षकको सहभागितामा भइरहेको हुँदा थप प्रभावकारी हुने अपेक्षा गरिएको छ।
तालिम यही माघ २७ गतेसम्म सञ्चालन हुनेछ।
