बझाङ : थलारा गाउँपालिकामा सुन्तलाजात फलफूल बगैचा पुर्नस्थापना तथा ह्रास रोग नियन्त्रण कार्यक्रम सम्बन्धि तालिम सुरु भएको छ । वडा नम्बर ८ भित्रका किसानहरुको लागि आज विहीबारबाट उक्त तालिम सुरु भएको हो ।
सुदूरपश्चिम प्रदेश भूमि व्यवस्था , कृषि तथा सहकारी मन्त्रालय कृषि विकास निर्देशनालय एवं बालि संरक्षण प्रयोगशालाको आयोजना तथा कृषि ज्ञान केन्द्र बझाङको समन्वयमा तीन दिने तालिम सञ्चालन भएको हो । सुन्तलाजात फलफूल बगैंचा कसरी स्थापना गर्ने र त्यसबाट आम्दानी कसरी लिन सकिन्छ लगाएका विषयमा सहभागीहरुलाई प्रशिक्षण गरिएको छ । आज पहिलो दिन कृषि ज्ञान केन्द्र बझाङका प्रमुख टेक बहादुर विष्टले सहभागी कृषकहरुलाई प्रशिक्षण गर्दै फलफूल खेतीको लागि सम्भावनाले भरिएको उक्त ठाउँमा किसानहरूले लगानी गरेमा प्रतिफल राम्रो पाइने बताउनुभयो ।
विष्टले सुन्तलाजातका फलफूल बाटै किसानले लाखौं रकम कमाएका उदाहरण दिदै जिविकोपार्जनमा सहजता ल्याउन र आत्मनिर्भर हुन किसान आफै जागरुक हुनुपर्ने बताउनुभयो । त्यसको लागि कृषि ज्ञान केन्द्र किसानको साथमा रहेको उहाँको भनाइ छ । तीन दिनसम्म चल्ने उक्त तालिममा किसानहरुलाई अन्तिम दिन स्थलगत भ्रमण गराउनुका साथै फलफूल लगाउने तरिका बारे अभ्यास भएको छ ।
बालि संरक्षण प्रयोगशाला कञ्चनपुरका कार्यालय प्रमुख भक्त बहादुर पानको अध्यक्षामा सञ्चालन भएको तालिममा वडा नम्बर ८ का वडा अध्यक्ष टिकाराज जोशी प्रमुख अतिथि रहनुभएको थियो । विशिष्ट अतिथिमा कृषि ज्ञान केन्द्र बझाङका कार्यालय प्रमुख टेक बहादुर विष्ट रहनुभएको थियोे । कार्यक्रममा वडा भित्रका करीब ८० जना स्थानीय कृषकको सहभागिता रहेको छ ।
