बझाङ : बझाङको खप्तडछान्ना गाउँपालिकामा १० शैयाको अस्पताल निर्माण कार्य जारी रहेको छ । संघिय सरकार अन्तर्गत स्वास्थ्य मन्त्रालयबाट ८ करोड ८० लाख ५९ हजारको लागतमा निर्माणाधीन अस्पतालको ७० प्रतिशत काम सम्पन्न भइसकेको गाउँपालिकाका सुचना अधिकारी ऐन बहादुर रोकायाले जानकारी दिनुभयो ।
खप्तडछान्ना गाउँपालिका वडा नम्बर ४ को सुकापाटिमा निमार्ण भइरहेको उक्त अस्पतालको रोयल पि एस जे भि ले २०७९ साल वैशाखमा ठेक्का सम्झौता गरेको थियो । आगामि वैशाखमा अस्पताल निमार्णको अवधि सकिदै छ । हालसम्म लगभग ४ करोड रकम भुक्तानी भएपनि संघीय मन्त्रालयबाट रकम निकासा नहुदा भुक्तानी गर्न समस्या भइरहेको निमार्ण कम्पनीको भनाई छ ।
अहिले पालिकामा सुविधा सम्पन्न अस्पताल नहुँदा खप्तडछान्नाबासिलाई जटिल स्वास्थ्य समस्या पर्दा जिल्ला सदरमुकाम तथा बाहिर जिल्ला धाउनुपर्ने बाध्यता रहेको छ । अब गाउँमै १० शैयाको अस्पताल सञ्चालन हुनेभएपछि स्थानीयवासी खुशी भएका छन् ।
