बझाङ : बझाङमा नियम विपरीत स्थानीयले पेस्तोल पट्काएको घटना छानविन गर्न प्रदेश प्रहरी कार्यालय धनगढीबाट एक टोली बझाङ आएको छ । गत कार्तिक ६ गते फुलपातिको दिन छविसपाथिभेरा गाउँपालिका–३ पाटागाउँमा खुलस्त रुपमा नियम विपरीत हातहतियारको दुरुपयोग गरेको घटना बाहिरिएपछि प्रदेश प्रहरी कार्यालयबाट छानबिनका लागि एक टोली बझाङ आएको हो ।
ब्याँसी प्रहरी चौकीका असई पुस्कल चन्दले गत कार्तिक ६ गते फुलपातिको दिन छविसपाथिभेराका पूर्व गाउँपालिका अध्यक्षसमेत रहेका अक्कल धामीलाई रमाइलोको लागि आफ्नो पेस्तोल पट्काउन दिएका थिए। खुलस्त रुपमा नियम विपरीत हातहतियारको दुरुपयोग गरेको उक्त विषयलाई कामना टेलिभिजन टिमले मंसिर ७ गते बाहिर ल्याएको थियोे । घटना घटेको एक महिना भए पनि अनविज्ञ रहेको बझाङ प्रहरीले उक्त कुरा थाहा पाएपछि अनुसन्धान सुरु गरेको थियो। अनुसन्धान पश्चात् घटनामा संलग्न असईलाई बझाङ प्रहरी प्रमुख तथा डिएसपी भरतबहादुर शाहले तत्काल पदबाट निलम्बन गरेका थिए । तर पेस्तोल पट्काउने पूर्व गाउँपालिका अध्यक्षलाई कारबाही गर्ने अधिकार जिल्लामा नभएकाले प्रदेशमा पत्र पठाइएको थियोे ।
केही दिनमै प्रदेश प्रहरी कार्यलयबाट एसपीको कमान्डमा अनुसन्धान तथा छानबिन समिति गठन गरिएको थियो। अहिले एक टोली अनुसन्धानका लागि बझाङ आएको हो । टोलीले असई पुस्कल चन्द, छविसपाथिभेराका पूर्व गाउँपालिका अध्यक्षसमेत रहेका अक्कल धामीमाथि अनुसन्धान थालेको छ । कानुनमा खुलस्त रुपमा नियम विपरीत हातहतियारको दुरुपयोग नगर्न पाइने उल्लेख छ ।
