बिरेन्द्र बाग
महेन्द्रनगर : कञ्चनपुरको महेन्द्रनगर बजार आज शनिबार बिहानैदेखि बन्द छ । राप्रपा कञ्चनपुरको आह्वानमा शुक्रबार दिउँसो महेन्द्रनगरमा आयोजित गणतन्त्रको विरोध सभा नाम दिइएको आन्दोलनमा सहभागी एक समूहले शहीद भीमदत्त पन्तको सालिकमा तोडफोड गरेको घटनामा संलग्न १८ जनालाई जिल्ला प्रहरी कार्यालय कञ्चनपुरले नियन्त्रणमा लिएपछि राप्रपा कञ्चनपुरले उनीहरूको निःशर्त रिहाइको माग गर्दै बजार बन्द गराएको हो ।
शनिबार बिहान एक समूहले बजारका सबै पसल व्यवसाय बन्द गराएको बताइएको छ । यसैबिच, कञ्चनपुरको महेन्द्रनगरस्थित भीमदत्त उद्यानमा राखिएको किसान नेता शहीद भीमदत्त पन्तको सालिकमा अराजक समूहले तोडफोड गरेको घटनाको चौतर्फी विरोध भइरहेको छ ।
