बझाङ : बझाङमा पनि हरितालिका तिजको रौनक बढेको छ । आज तीजको दरखाने दिनसँगै तीज पर्व शुरु भएको छ । तर, बझाङ सदरमुकाम चैनपुर सहित बजारदेखि गाउँघरसम्म तिजको स्वागतका लागि हप्तौदेखि दर खाने कार्यक्रमको आयोजना गरिएका छन् । भोली असोज १ गते हरितालिका तिज पर्व धुमधामले मनाइदै छ। तिज नेपाली हिन्दू नारीले विषेश महत्त्वका साथ मनाउने गर्दछन् ।
भाद्र शुक्ल द्वितीयादेखि पञ्चमीसम्म चार दिन विषेश रूपमा मनाइने यो पर्वमा भगवान शिवको पूजा आरधना गरिनुका साथै कठोर व्रत बसेर नाचगान एवं मनोरञ्जन गर्ने परम्परा छ । नेपाली हिन्दू महिलाले तिज आउनुभन्दा १०÷१५ दिन अगाडिबाट नै हर्षोल्लासका साथ मनाउन सुरु गर्छन् । हिमालय पुत्री पार्वतीले भगवान शिवको स्वास्थ्य अवस्था राम्रो होस् भन्ने उद्धेश्यले कठोर रूपमा पहिलोपटक व्रत राखेको धार्मिक विश्वासका साथ हिन्दू नारीले यो पर्व मनाउँदै आएका छन् ।
तिजका बेला विवाहित हिन्दू महिलाले श्रीमानको दीर्घायूका लागि कठोर व्रत बस्ने गर्दछ्न् भने अविवाहिताहरुले पानीसम्म नपिएर व्रत बस्दै शिब भगवानका साथै सप्तऋषिको पूजा गर्दै नाचगान गर्छन् । यसैबिच बझाङका सबै पालिकाहरुमा तिज विशेष कार्यक्रम पनि सञ्चालन भइरहेका छन् । जसअन्र्तगत छबिस पाथिभेरा गाउँपालिका–१ का महिलाहरूले तिज विशेष २०८० कार्यक्रम भव्यताका साथ मनाएका छन् । हरितालिका तिजलाई उत्साहपूर्ण ढङ्गले शनिवार विविध कार्यक्रम गरी मनाएका हुन् । विवाहित महिलाहरूले आफ्नो सौभाग्य, परिवारको सु–स्वास्थ्य अनि दीर्घायुका लागी र अविवाहित नारीहरूले आफूले भने जस्तै, सोचेजस्तो वर पाइयोस् भनेर व्रत बस्ने प्रचलन र धार्मिक विश्वास रहेको हिन्दु नारीहरूको विशेष चाँडमा महिलाहरूले एकअर्काप्रती शुभकामना समेत साटासाट गरेका छन् ।
प्रत्येक वर्ष हरितालिका तिज कार्यक्रमलाई महाभिलाषी राख्ने महिलाले पछिल्लो समय बढ्दो क्रममा रहेको विकृति, छाउपडी प्रथा, महिला हिंसा न्यूनीकरण, सामाजिक भेदभाव, कुरीति कुसंस्कारका विरुद्ध विभिन्न सन्देशमूलक गीत सहित नृत्य प्रदर्शन गरेका थिए ।
