देशभर मनसुनी प्रभाव सक्रिय, यी चार प्रदेशमा भारी वर्षाको सम्भावना
काठमाडौँ- हाल देशभर मनसुनी वायुको प्रभाव सक्रिय रहेको मौसम पूर्वानुमान महाशाखाले जनाएको छ। साथै भारतको उत्तर प्रदेश आसपास विकसित भएको न्यूनचापीय प्रणालीको प्रभावसमेत देशमा परेको छ। मनसुनको न्यूनचापीय रेखा औसत स्थानको नजिकै अवस्थित भएकाले मौसममा व्यापक प्रभाव देखिएको हो।
महाशाखाका अनुसार हाल देशभर आंशिकदेखि सामान्य बदली रहेको छ। बागमती, गण्डकी र लुम्बिनी प्रदेशका केही स्थानहरूमा तथा कोशी, कर्णाली र सुदूरपश्चिम प्रदेशका एक-दुई स्थानमा हल्कादेखि मध्यम वर्षा भइरहेको छ।
दिउँसोको पूर्वानुमानअनुसार, देशभर आंशिकदेखि सामान्य बदली रहनेछ। कोशी, बागमती, गण्डकी र कर्णाली प्रदेशका साथै बाँकी प्रदेशका पहाडी भू-भागमा केही स्थानहरूमा र अन्य भागका थोरै स्थानहरूमा चट्याङसहित हल्कादेखि मध्यम वर्षाको सम्भावना छ। कोशी, बागमती, गण्डकी र कर्णाली प्रदेशका एक-दुई स्थानमा भारी वर्षाको पनि सम्भावना रहेको छ।
...
