धनगढी- कैलालीको गौरीगंगा नगरपालिकामा रहेको एक विद्यालयका प्रधानाध्यापकलाई आफ्नो विद्यालय भन्दा भत्ता प्यारो भएको पाइएको छ । गौरीगंगा नगरपालिका-९ स्थित बनखेतमा रहेको जनचेतना आधारभूत विद्यालयका प्रधानाध्यापक गणेश प्रसाद भट्टराईलाई आफ्नो विद्यालय भन्दा भत्ता प्यारो भएको पाइएको हो ।
विद्यालयको प्रशासनिक तथा पठनपाठन गतिविधिको नेतृत्व र नियमित निगरानी गर्नुपर्ने जिम्मेवारीमा रहेका प्रधानाध्यापक भट्टराई हाल सञ्चालन भइरहेको ब्याचुलर प्रथम वर्षको परीक्षामा गार्ड तथा सहजीकरणका लागि विद्यालयबाहिर गएको स्रोतको दाबी छ।
भट्टराई खप्तड बहुमुखी क्याम्पसमा भइरहेको ब्याचुलर तहको परीक्षामा सहभागी भएको बताइएको छ। विद्यालयको नियमित जिम्मेवारी सम्हाल्नुपर्ने समयमा प्रधानाध्यापक नै अन्यत्र गएर परीक्षा ड्युटीमा खटिएपछि विद्यालयको प्रशासनिक काम र पठनपाठनको निगरानी कसले गरिरहेको छ भन्ने प्रश्न उठेको छ।
प्रधानाध्यापक विद्यालयको शैक्षिक तथा प्रशासनिक नेतृत्व गर्ने प्रमुख व्यक्ति हुन्। शिक्षक तथा विद्यार्थीको नियमित गतिविधिको अनुगमनदेखि विद्यालयको समग्र व्यवस्थापनसम्म उनको महत्वपूर्ण भूमिका हुन्छ।
त्यसैले आफ्नो मूल जिम्मेवारी छाडेर अन्यत्र परीक्षा ड्युटीमा जानुपर्ने अवस्था किन आयो? त्यसका लागि सम्बन्धित निकायबाट अनुमति लिइएको थियो कि थिएन? र परीक्षा ड्युटीबाट प्राप्त हुने भत्ताका लागि विद्यालयको जिम्मेवारी प्रभावित भएको हो कि होइन भन्ने लगायतका प्रश्न खडा भएका छन् ।
विद्यालयको जिम्मेवारीभन्दा अतिरिक्त भत्ता महत्वपूर्ण भएको हो कि भन्ने प्रश्नसमेत स्थानीयस्तरमा उठ्न थालेको छ। यद्यपि, प्रधानाध्यापक भट्टराईको भनाइ र सम्बन्धित विद्यालय तथा नगरपालिकाको आधिकारिक धारणा सार्वजनिक भएपछि मात्रै यस विषयमा थप स्पष्टता आउनेछ।
