बैतडी- बैतडीको पुर्चौडी नगरपालिका-८ मल्लादेहीका स्थानीयवासीले वर्षौंदेखि अलपत्र अवस्थामा रहेको सडक तत्काल सञ्चालनमा ल्याउन माग गरेका छन्। ढोल्यामोड-कोटिला-मल्लादेही हुँदै हाटसम्म जोड्ने सडक निर्माणको काम सम्पन्न भए पनि नियमित यातायात सञ्चालन हुन नसकेको भन्दै स्थानीयले नगरपालिकासहित सम्बन्धित निकायको ध्यानाकर्षण गराएका हुन्।
वि.सं. २०७३ सालमा स्थानीयवासीको श्रम, लगानी र सक्रिय सहभागितामा ढोल्यामोड-कोटिला-मल्लादेही हुँदै हाटसम्म सडक निर्माणको अभियान सुरु गरिएको थियो। सडकको प्रारम्भिक कटिङको कामसमेत स्थानीयवासीको सहभागितामै सम्पन्न भएको थियो। सडक मल्लादेही हुँदै लैजाने वा छोटो मार्गबाट लैजाने विषयमा विवाद भए पनि गाउँको दीर्घकालीन हित, सहज यातायात र विकासलाई प्राथमिकतामा राख्दै स्थानीयले मल्लादेही हुँदै सडक निर्माण अघि बढाएका थिए।
सडक निर्माण अभियानमा मल्लादेहीका स्वर्गीय राजेन्द्र लुहारको महत्वपूर्ण योगदान रहेको स्थानीयवासी बताउँछन्। शिक्षक तथा समाजसेवी लुहारले स्थानीयलाई एकताबद्ध गर्दै सडक निर्माणका लागि नेतृत्वदायी भूमिका निर्वाह गरेको उनीहरूको भनाइ छ। उनको योगदानलाई स्थानीयले अहिले पनि सम्मानका साथ स्मरण गर्दै आएका छन्।
तर सडकको कटिङ सम्पन्न भए पनि विभिन्न कारणले लामो समयसम्म सवारी साधन सञ्चालन हुन सकेन। प्रभावकारी व्यवस्थापन, नियमित मर्मत तथा सम्बन्धित निकायको पर्याप्त ध्यान नपुग्दा करिब पाँच वर्षसम्म स्थानीयवासीले सहज यातायातको सुविधा पाउन नसकेको गुनासो गरेका छन्।
वि.सं. २०७८ मंसिर १ गते सुदूरपश्चिम यातायातको बस ढोल्यामोड–हाट सडकअन्तर्गत मल्लादेही रुट हुँदै सञ्चालनमा आएपछि स्थानीयवासीमा सडक नियमित सञ्चालन हुने आशा जागेको थियो। तर उक्त बस सेवा दुई दिनमै बन्द भएपछि पुनः यातायात सेवा ठप्प भएको स्थानीयवासीको भनाइ छ।
सडक सञ्चालन नहुँदा स्थानीयलाई शिक्षा, स्वास्थ्य, कृषि, व्यापार तथा दैनिक आवतजावतमा समस्या हुँदै आएको छ। सडकको अवस्था सुधार गरी नियमित यातायात सञ्चालन गर्न पटक–पटक नगरपालिका तथा सम्बन्धित निकायसँग माग गरे पनि अपेक्षित सुनुवाइ नभएको स्थानीयको गुनासो छ।
स्थानीयवासीले मल्लादेही सडकलाई तत्काल सञ्चालनमा ल्याउनुपर्ने, सडकको स्तरोन्नति तथा नियमित मर्मत गर्नुपर्ने र आवश्यक पूर्वाधार निर्माणलाई प्राथमिकता दिनुपर्ने माग गरेका छन्।
त्यस्तै, पुर्चौडी क्षेत्रका सडकमा विनियोजन हुने विकास बजेट पारदर्शी रूपमा जनताको आवश्यकता र प्राथमिकताका आधारमा खर्च गर्नुपर्ने उनीहरूको माग छ। पुर्चौडीका सबै सडकलाई दीर्घकालीन रूपमा सञ्चालनयोग्य बनाउने गरी योजना बनाउनुपर्ने स्थानीयको भनाइ छ।
‘हामीलाई आश्वासन होइन, सञ्चालनमा रहेको सडक चाहिएको छ। भाषण होइन, विकास चाहिएको छ,’ स्थानीयवासीले भनेका छन्।
स्थानीयले आफ्नो माग कुनै व्यक्ति वा राजनीतिक दलविरुद्ध नभई गाउँको विकास, जनताको अधिकार र समृद्धिका लागि गरिएको न्यायोचित तथा शान्तिपूर्ण अपिल भएको बताएका छन्।
उनीहरूले पुर्चौडी नगरपालिकाको नेतृत्वलाई जनताको आधारभूत आवश्यकता र विकास निर्माणमा केन्द्रित हुन आग्रह गरेका छन्। ‘पुर्चौडी सरकारको ध्यान भ्रष्टाचारतर्फ होइन, विकासतर्फ जाओस्,’ स्थानीयवासीको माग छ।
सडक सञ्चालनमा आएमा मल्लादेहीसहित पुर्चौडीका विभिन्न क्षेत्रका नागरिकलाई आवतजावतमा सहजता हुनुका साथै कृषि उत्पादनको बजारीकरण, शिक्षा, स्वास्थ्य र स्थानीय आर्थिक गतिविधिमा समेत सकारात्मक प्रभाव पर्ने स्थानीयको अपेक्षा छ।
Advertisement
