बझाङ । राष्ट्रिय स्वतन्त्र पार्टी (रास्वपा) जिल्ला अधिवेशनमा निर्वाचन प्रक्रियामाथि गम्भीर प्रश्न उठेको छ। उपसभापति पदका उम्मेदवार अरुण कुमार रोकाया ले निर्वाचनमा फर्जी मत हालेर नतिजा प्रभावित गरिएको आरोप लगाउँदै केन्द्रीय कार्यालयमा औपचारिक निवेदन दर्ता गरेका छन्।
रोकायाका अनुसार अधिवेशनमा जम्मा १५३ मत खसेको थियो। तर मतगणनाका क्रममा आफूले ८४ मत र प्रतिस्पर्धी राम देवार ले ९९ मत प्राप्त गरेको देखाइएको छ। यस आधारमा कुल गणना गरिएको मत संख्या १८३ पुग्ने भएकाले ३० मत बढी देखिएको उनको दाबी छ।
रोकायाले सार्वजनिक रूपमा भनेका छन्, “जम्मा खसेको मत १५३ हुँदा दुई उम्मेदवारको मत जोड्दा १८३ पुग्नु निर्वाचन प्रक्रियामाथिको गम्भीर प्रश्न हो। यसबारे निष्पक्ष छानबिन गरी दोषीलाई कारबाही गरिनुपर्छ।”
उनले निर्वाचनमा षड्यन्त्र, जालझेल तथा फर्जी मत प्रयोग भएको आरोप लगाउँदै दोषीमाथि कारबाही नभएसम्म पार्टी केन्द्रीय कार्यालय अगाडि अनशन बस्ने चेतावनी समेत दिएका छन्।
रोकायाले निर्वाचन व्यवस्थापनको जिम्मेवारीमा रहेका झलक एडी (निर्वाचन प्रमुख), सन्तोष जोशी (रास्वपा सुदूरपश्चिम प्रदेश महामन्त्री) तथा नरेन्द्र खड्का को भूमिकामाथि पनि प्रश्न उठाएका छन्। उनले सम्पूर्ण घटनाको निष्पक्ष छानबिन गरी वास्तविकता सार्वजनिक गर्न पार्टी नेतृत्वसँग माग गरेका छन्।
यता, आरोपित पक्ष तथा निर्वाचन समितिको औपचारिक प्रतिक्रिया भने सार्वजनिक भइसकेको छैन। पार्टी केन्द्रीय कार्यालयले यस विषयमा छानबिन प्रक्रिया अगाडि बढाउने वा नबढाउनेबारे पनि हालसम्म कुनै आधिकारिक धारणा सार्वजनिक गरेको छैन।
रास्वपाले सुशासन, पारदर्शिता र स्वच्छ राजनीतिक अभ्यासको नारा अघि सारेका बेला बझाङ अधिवेशनमा उठेको यो विवादले पार्टीभित्रको आन्तरिक लोकतन्त्र र निर्वाचन व्यवस्थापनमाथि प्रश्न खडा गरेको छ। अब पार्टी नेतृत्वले यस विषयलाई कसरी सम्बोधन गर्छ भन्ने चासो कार्यकर्तामाझ बढेको छ।
