काठमाडौं- नेकपा (एमाले) का अध्यक्ष केपी शर्मा ओलीले वर्तमान सरकारको १०० दिने कार्यकालले देशको लोकतन्त्र र वामपन्थी आन्दोलनलाई गम्भीर धक्का पुर्याएको आरोप लगाएका छन्।
बिहीबार च्यासलस्थित पार्टी केन्द्रीय कार्यालयमा आयोजित कार्यक्रममा बोल्दै अध्यक्ष ओलीले सरकारको कार्यशैली लोकतन्त्रविरोधी र फासीवादी प्रवृत्तितर्फ उन्मुख रहेको दाबी गरे।
उनले सरकारले सुकुमवासी बस्तीमा डोजर चलाएर सर्वसाधारणलाई दुःख दिएको तथा बालबालिकाको भविष्यसमेत प्रभावित बनाएको आरोप लगाए। सरकारको अहंकारी कार्यशैलीप्रति व्यङ्ग्य गर्दै उनले वर्तमान सरकारलाई ‘उम्लिएको दूध’सँग तुलना गरे।
अध्यक्ष ओलीले मन्त्रीहरूमा उत्तरदायित्वको अभाव रहेको, बजेटमा सतही योजना मात्र समेटिएको तर कार्यान्वयनमा कुनै उल्लेखनीय प्रगति नभएको टिप्पणी गरे। दैलेखको ग्यास उद्योगको व्यावसायिक उत्खनन र प्रशोधन प्रक्रिया अघि नबढाउँदा मुलुकले दैनिक अर्बौं रुपैयाँ बराबरको सम्भावित आम्दानी गुमाइरहेको दाबी गर्दै उनले सरकारलाई अकर्मण्य भएको आरोप लगाए।
उनले भने, “अहिले मुलुकमा खुसी हुने कुनै ठाउँ छैन। अहिलेको सरकार उम्लिएको दूधजस्तै छ, यो पोखिन्छ। यसका खुट्टा भुइँमा छैनन्। हामीले शिलान्यास गरेका आयोजना उद्घाटन गर्नसमेत यो सरकारलाई अप्ठ्यारो परेको छ।”
देशको वर्तमान अवस्था निराशाजनक रहेको उल्लेख गर्दै अध्यक्ष ओलीले सरकारमा कर्तव्यबोधको अभाव रहेको र यही कारण मुलुक सही दिशामा अघि बढ्न नसकेको दाबी गरे।
