बझाङ- जिल्ला अस्पताल सिमखेतको अध्यक्षमा विरेन्द्र बहादुर खड्का चयन भएका छन् । स्वास्थ्य सेवाको गुणस्तर सुधार र संस्थागत सुशासन प्रवर्द्धनमा अनुभव हासिल गरेका खड्का अध्यक्षमा नियुक्त भएसँगै स्वास्थ्य क्षेत्रप्रति नयाँ अपेक्षा बढेको छ।
जयपृथ्वी नगरपालिका–३, बझाङका स्थायी बासिन्दा खड्काले त्रिभुवन विश्वविद्यालयबाट राजनीति शास्त्रमा स्नातकोत्तर (एमए) तथा पाठ्यक्रम तथा मूल्यांकन विषयमा एमएड उत्तीर्ण गरेका छन्। विद्यार्थी राजनीतिबाट आफ्नो सार्वजनिक जीवन सुरु गरेका उनी अनेरास्ववियुका विभिन्न तहमा सक्रिय रहँदै केन्द्रीय सदस्यसम्मको जिम्मेवारी सम्हालिसकेका छन्।
विद्यार्थी आन्दोलनको क्रममा उनले कैलाली बहुमुखी क्याम्पस स्वतन्त्र विद्यार्थी युनियनको सचिवको भूमिका निर्वाह गरेका थिए। अहिले खड्का नेकपा एमालेको जिल्ला कमिटी सदस्य रहेका छन् ।
खड्काले गैरसरकारी तथा अन्तर्राष्ट्रिय गैरसरकारी संस्थासँग सहकार्य गर्दै गाउँपालिकाहरूमा सामाजिक परीक्षण र सार्वजनिक सुनुवाइ कार्यक्रम सञ्चालन गरेका छन्। साथै, सामाजिक विकास मन्त्रालयसँग समन्वय गरी जवाफदेहिता सम्बन्धी विभिन्न कार्यक्रमहरूमा संलग्न रहेका उनी बझाङ जिल्ला अस्पताल तथा अन्य स्वास्थ्य संस्थाहरूमा पनि पारदर्शिता र उत्तरदायित्व अभिवृद्धिमा सक्रिय रहँदै आएका छन्।
नवनियुक्त अध्यक्ष खड्काले अस्पतालको सेवा प्रवाह सुधार, व्यवस्थापन सुदृढीकरण तथा जनविश्वास अभिवृद्धि आफ्नो प्राथमिकतामा रहने बताएका छन्। उनले भने, ´अस्पताललाई जनमैत्री, पारदर्शी र प्रभावकारी बनाउने दिशामा सबै सरोकारवालासँग सहकार्य गर्नेछु ।` स्थानीयवासीले भने खड्काको नेतृत्वमा जिल्ला अस्पतालले नयाँ गति लिने अपेक्षा गरेका छन्।
