काठमाडौं- हरितालिका तीजको अघिल्लो दिन आज देशभर दर खाएर मनाइँदै छ। दर खाने दिन परिवार, इष्टमित्र र छिमेकी भेला भएर विभिन्न परिकार सेवन गर्दै रमाइलो गर्ने परम्परा रहिआएको छ। तीजको दिन निराहार व्रत बस्ने भएकाले अघिल्लो दिन पौष्टिक खाना खाने चलन रहेको विश्वास गरिन्छ।
एक दिन मात्र दर खाने परम्परा भए पनि हाल काठमाडौंलगायत शहरी क्षेत्रमा एक महिना अघिदेखि नै दर खाने र खुवाउने चलन चलेको छ। साथै विभिन्न संघसंस्था र कार्यालयहरूले तीज मिलन कार्यक्रम आयोजना गर्ने प्रचलन बढ्दो छ।
पौराणिक विश्वासअनुसार देवी पार्वतीले भगवान शिवलाई पति पाउन निराहार व्रत बसेपछि आफ्नो कामना पूरा भएको थियो। त्यसैको सम्झनामा विवाहित महिलाले पतिको दीर्घायु र स्वास्थ्यको कामना गर्दै तथा अविवाहित महिलाले सुयोग्य बर पाउने आशामा तीजको व्रत बस्ने गर्छन्। तीजको दिन काठमाडौंको पशुपतिनाथ मन्दिरलगायत देशभरका शिवालयहरूमा व्रतालुको ठूलो भीड लाग्ने गर्दछ। पूजाआजापछि महिला–पुरुष एकैठाउँ भेला भई तीज गीत गाउने, नाच्ने र उल्लासपूर्ण वातावरण सृजना गर्ने परम्परा छ।
यस वर्ष तीजको चारदिने पर्व सोमबार दर खाने दिनबाट सुरु भएको छ। मंगलबार मुख्य दिन मानिने तीजमा महिलाले निराहार व्रत बसेर भगवान शिवको आराधना गर्नेछन्। बुधबार गणेश चौथी पर्व मनाइनेछ भने बिहीबार अरुन्धतीसहित सप्तऋषिको पूजाआराधना गर्दै पर्व समापन गरिनेछ।
