दार्चुला- दार्चुलाको शैल्यशिखर नगरपालिकामा सञ्चालित ‘ओखर पकेट क्षेत्र कार्यक्रम’मा रकम हिनामिना गर्न जीवित व्यक्तिलाई मृत देखाएर फर्जी कागज बनाइएको खुलेको छ।
नगरपालिकाको कृषि शाखा प्रमुख दिपकराज विष्ट र भेटेरिनरी प्राविधिक जनसिंह धामी (नगर प्रमुख विजयसिंह धामीका छोरा) को मिलोमतोमा वडा नं. ६ का मालिकार्जुन अगुवा कृषक समूहका कोषाध्यक्ष जानकी धामी र सचिव मञ्जु धामीलाई मृत देखाइएको हो।
कृषि शाखा प्रमुखले ग्लोबल आईएमई बैंक गोकुलेश्वर शाखामा पत्र पठाउँदै जानकी र मञ्जुको सट्टा अध्यक्ष जनकसिंह धामी र सचिव बसन्ती बोहराका हस्ताक्षर मान्य गरिदिन अनुरोध गरेका थिए।
पीडित जानकी र मञ्जुले आफूहरूलाई मरेको भनी झूटा कागज बनाएर खाताबाट रकम निकाल्ने प्रयास भएको जनाए। उनीहरूका अनुसार समूह लामो समयदेखि निष्क्रिय थियो, तर अध्यक्षले कार्यक्रमको रकम हत्याउन फर्जी कागज बनाए।
कृषि शाखा प्रमुख विष्टले समूहको अध्यक्षले दिएको निवेदन र माइन्युटका आधारमा पत्राचार गरिएको स्वीकारे पनि मृत्युदर्ता प्रमाणपत्र नखोजिएको गल्ती भएको माने।
वेटेरिनरी प्राविधिक समेत रहेका अध्यक्ष जनसिंह धामीले खाता नविकरणमा सहयोग नपाएको रिसमा कागज तयार पारेको स्वीकारे र गल्तीको जिम्मेवारी लिन तयार रहेको बताए।
घटनाबारे दुबै पक्षको बयान लिएर आवश्यक कारबाही गरिने प्रमुख प्रशासकीय अधिकृत सुरेन्द्र विष्टले जानकारी दिए।
कानुनी दृष्टिकोणबाट के हुन्छ?
- मृत्यु नभएको व्यक्तिलाई मृत घोषणा गर्ने कार्य नेपालको प्रचलित कानुन अनुसार झुटा प्रमाणपत्र बनाउने, कागजात किर्ते गर्ने, र अख्तियारको दुरुपयोग गर्ने कसुरमा पर्छ।
- कृषि शाखामा कार्यरत कर्मचारीले राजनीतिक स्वार्थमा सिफारिस गर्नु, भ्रष्टाचार निवारण ऐन, २०५९ अनुसार कडा सजाययोग्य अपराध हो।
- अख्तियार दुरुपयोग अनुसन्धान आयोगबाट अनुसन्धान हुन सक्ने आधारहरू पर्याप्त छन्।
