कैलाली : कैलाली बहुमुखी क्याम्पस (केएमसी) मा यही चैत्र २७ गते हुन गइरहेको स्वतन्त्र विद्यार्थी युनियन (स्ववियु) निर्वाचनका लागि महेश्वरी रेग्मी स्वतन्त्र उम्मेदवारका रूपमा प्रस्तुत भएकी छन्। उनले विद्यार्थीका अधिकार, शिक्षाको गुणस्तर सुधार, नियमित कक्षा सञ्चालन, पारदर्शी प्रशासन र क्याम्पसलाई राजनीतिक हस्तक्षेपमुक्त बनाउने मुख्य एजेन्डासहित उम्मेदवारी घोषणा गरेकी छन्।
महेश्वरी रेग्मी हाल मानवीकी संकायकी पाँचौं सेमेस्टरकी विद्यार्थी हुन्। लामो समयदेखि विद्यार्थीका समस्याहरूलाई नजिकबाट अध्ययन गर्दै आएकी उनले यो निर्वाचनमार्फत क्याम्पसमा सकारात्मक परिवर्तन ल्याउने अठोट लिएकी छन्। उनी भन्छिन्, “शिक्षालयलाई शिक्षालय नै बनाऔं, राजनीतिलाई राजनीति गर्ने ठाउँमै छाडौं। विद्यार्थीका हकहितमा कोही सम्झौता गर्न सक्दैन।”
उनको प्रमुख एजेन्डा क्याम्पसमा नियमित कक्षा सञ्चालन गराउनु, विद्यार्थीहरूका समस्या समाधान गर्न सहज पहुँचको व्यवस्था मिलाउनु, परीक्षा प्रणाली पारदर्शी बनाउनु, शुल्क संरचनामा विद्यार्थी मैत्री नीति अवलम्बन गराउनु र स्ववियुलाई विद्यार्थीका वास्तविक मुद्दामा केन्द्रित गराउनु रहेको छ।
उनले विशेष रूपमा महिलाका हकअधिकारको सशक्त वकालत गर्दै सबै विद्यार्थीका लागि समान अवसर सुनिश्चित गर्ने प्रतिज्ञा गरेकी छन्। उनी भन्छिन्, “विद्यार्थी शक्ति नै राष्ट्र शक्ति हो। हामी विद्यार्थीले आफ्नो भविष्यप्रति सचेत रहनुपर्छ। अब नेतृत्व विद्यार्थीका लागि हुनुपर्छ, दलका लागि होइन।”
उनले क्याम्पसका विद्यार्थीहरूलाई सोचविचार गरी सही निर्णय गर्न आग्रह गरेकी छन्। उनी थप्छिन्, “यदि तपाईंहरू एक स्वतन्त्र, पारदर्शी, र विद्यार्थी केन्द्रित नेतृत्व चाहनुहुन्छ भने यो पटकको निर्वाचनमा स्वतन्त्र विद्यार्थी समूहलाई समर्थन गर्नुहोस्।”
उनको उम्मेदवारीले क्याम्पसमा नयाँ सोच, नवीन ऊर्जा र विद्यार्थी हितमा समर्पित नेतृत्वको आशा जगाएको छ। अब निर्णय विद्यार्थीहरूको हातमा छ – क्याम्पसको वास्तविक सुधार चाहनेहरूका लागि यो एउटा महत्त्वपूर्ण अवसर बन्न सक्छ।
