बझाङ- बर्खायाम सुरुभएसँगै ग्रामीण सडकहरू अवरुद्ध हुन थालेका छन् । लगातारको वर्षासँगै आएकोे बाढीपहिरोले स्थानीय शाखा सडक खण्डहरू अवरुद्ध हुन थालेका हुन् । प्राप्त जानकारी अनुसार छबिसपाथिभेरा गाउँपालिका अन्तर्गत मोरिबगर-बिसौना सडक खण्ड अवरुद्ध भएको छ ।
वडा नं-६ अन्तर्गत पर्ने ल्वाडाको डोलामा पहिरो जाँदा सडक अवरुद्घ भएर आवतजावत ठप्प भएको हो। सडक अवरुद्ध भएपछि स्थानीयवासी, बिरामी, विद्यार्थी तथा दैनिक उपभोग्य सामग्री ढुवानीमा समेत समस्या उत्पन्न भएको छ।
जिल्लाका अन्य धेरै ग्रामीण सडकहरू पनि वर्षाका कारण आंशिक वा पूर्ण रूपमा अवरुद्ध भएको प्रारम्भिक जानकारी प्राप्त भए पनि विस्तृत विवरण आउन बाँकी रहेको छ।
स्थानीयवासीले बर्खायाम सुरु हुनुअघि नै जोखिमयुक्त स्थानको पहिचान, नाली तथा पानी निकासको उचित व्यवस्थापन, सडक किनारका कमजोर भागको संरक्षण, आवश्यक स्थानमा ग्याबियन पर्खाल तथा रिटेनिङ वाल निर्माण, र नियमित मर्मतसम्भार गरिए यस्ता समस्या धेरै हदसम्म कम गर्न सकिने बताएका छन्। साथै, वर्षायामभरि डोजर, एक्साभेटर लगायतका उपकरण र प्राविधिक जनशक्ति तयारी अवस्थामा राखी पहिरो हटाउने कार्य तत्काल सञ्चालन गर्न उनीहरूको माग छ।
ग्रामीण सडकहरू वर्षायाममा बारम्बार अवरुद्ध हुने समस्यालाई दीर्घकालीन रूपमा समाधान गर्न स्थानीय, प्रदेश र संघीय सरकारबीच समन्वय गरी विपद् जोखिम न्यूनीकरणमा आधारित सडक निर्माण, गुणस्तरीय पूर्वाधार विकास तथा नियमित मर्मतसम्भारलाई प्राथमिकता दिन आवश्यक देखिन्छ।
सडक अवरुद्ध हुँदा सर्वसाधारणले सास्ती खेप्न बाध्य भइरहेका छन्। त्यसैले प्रभावित सडकहरू यथाशीघ्र सञ्चालनमा ल्याउन सम्बन्धित निकायले तत्काल आवश्यक पहल गर्नुपर्ने स्थानीयको जोडदार माग रहेको छ।
