काठमाण्डौ– आज विश्व शौचालय दिवस विभिन्न कार्यक्रमसहित मनाइँदैछ। व्यक्तिगत, सामुदायिक, सरकारी तथा गैरसरकारी संस्थाहरूले सरसफाइ सचेतना र पानी–सफाइ सम्बन्धी गतिविधि सञ्चालन गरिरहेका छन्। विद्यालयहरूमा सरसफाइ कक्षा, सार्वजनिक छलफल, नीतिसंवाद र अनुभव आदान–प्रदानजस्ता कार्यक्रम पनि हुँदैछन्।
यो दिवसले सुरक्षित र पर्याप्त खानेपानी उपलब्ध गराउने, खुला दिसापिसाब गर्ने बानी हटाउने र दिगो तथा स्वच्छ सरसफाइ सेवा विस्तार गर्ने सन्देश दिन्छ। सन् २०१३ देखि मनाइँदै आएको विश्व शौचालय दिवसको मुख्य उद्देश्य सबैका लागि पहुँचयोग्य र सुरक्षित शौचालय सुनिश्चित गर्नु हो। यसका साथै पानीको गुणस्तर सुधार, जलस्रोतको दिगो व्यवस्थापन तथा अन्तर्राष्ट्रिय सहकार्य र क्षमता अभिवृद्धिलाई प्रोत्साहन गर्ने लक्ष्य पनि यसमा समावेश छ।
राष्ट्रसंघका अनुसार विश्वभर तीन अर्ब ४० करोड मानिस अझै पनि सुरक्षित रूपमा व्यवस्थित सरसफाइ सेवाबाट वञ्चित छन्। त्यस्तै ३५ करोड ४० लाख मानिस खुला स्थानमै दिसापिसाब गर्न बाध्य छन्। विशेष गरी महिला र बालिकाको सुरक्षाका लागि शौचालयको पहुँच अत्यन्त आवश्यक मानिन्छ।
सरसफाइ र पानीसम्बन्धी मुद्दामा विश्व समुदायलाई जोडदार रूपमा क्रियाशील हुन राष्ट्रसंघले आह्वान गर्दै आएको छ।
