काठमाण्डौ– कोशी र गण्डकी प्रदेशको हिमाली क्षेत्रमा आज एक/दुई स्थानमा हल्का वर्षा तथा हिमपात हुने सम्भावना रहेको जल तथा मौसम पूर्वानुमान महाशाखाले जनाएको छ। अहिले कोशी, गण्डकी र कर्णाली प्रदेशका पहाडी तथा हिमाली भू–भागमा आंशिकदेखि पूर्ण बदलीको अवस्था देखिएको महाशाखाले जानकारी दिएको हो।
महाशाखाका अनुसार दिउँसोपछि कोशी र गण्डकी प्रदेशका उच्च भू–भागमा हल्का वर्षा र हिमपातको सम्भावना रहेकाले सावधानी अपनाउन अनुरोध गरिएको छ। देशका अन्य धेरै स्थानमा भने मौसम सामान्यतया सफा रहनेछ।
महाशाखाले हाल देशभर कुनै उल्लेखनीय मौसमी प्रणाली सक्रिय नरहेकाले व्यापक वर्षा हुने अवस्था नभएको स्पष्ट पारेको छ। आज राति कोशी र गण्डकी प्रदेशका पहाडी क्षेत्रहरूमा आंशिक बदली रहँदा देशका बाँकी भागमा मौसम सफा रहने अनुमान गरिएको छ।
