काठमाडौँ- माओवादी केन्द्र, नेकपा (एकीकृत समाजवादी) र नेपाल समाजवादी पार्टीसहितका आठ राजनीतिक दल आज एकता घोषणा गर्न लागेका छन्। काठमाडौँको भृकुटीमण्डप प्रदर्शनी केन्द्रमा दिउँसो विशेष कार्यक्रममार्फत एकताको घोषणा हुने भएको हो।
कार्यक्रमलाई माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधवकुमार नेपाल लगायत शीर्ष नेताहरूले सम्बोधन गर्ने तयारी गरिएको छ।
यी दल र समूहले केही दिनअघि आइतवार १८ बुँदे सहमति पत्रमा हस्ताक्षर गरेका थिए। सहमति अनुसार नयाँ पार्टीको नाम ‘नेपाली कम्युनिस्ट पार्टी (नेकपा)’ रहने र पाँचतारे तारा चुनाव चिह्न अपनाइने भएको छ।
तर, एकताप्रति असन्तुष्टि जनाउने केही नेताहरू भने छुट्टै छलफलमा जुटेका छन्। उनीहरू अन्य दलका शीर्ष नेतासँग पनि परामर्श गर्दैछन्।
त्यसमध्ये नेकपा (एस) का सम्मानित नेता झलनाथ खनालले मंगलबार एमाले अध्यक्ष केपी शर्मा ओलीसँग भक्तपुरको गुन्डुस्थित ओलीको निवासमा भेटवार्ता गरेका छन्। माओवादी केन्द्र र अन्य दलबीच एकता प्रक्रिया अघि बढेपछि खनाललगायतका केही नेताहरू असन्तुष्ट देखिएका हुन्।
