बाजुरा- जिल्लाको बडीमालिका नगरपालिका–६ र ८ को सीमास्थित रापका क्षेत्रको विरेखोला झरना पछिल्लो समय आन्तरिक पर्यटकको प्रमुख गन्तव्यका रूपमा चिनिँदै गएको छ।
जिल्ला सदरमुकाम मार्तडीबाट झण्डै ६ किलोमिटर दूरीमा रहेको झरना साफे–मार्तडी सडकखण्डको छेउमै भएकाले सजिलै पुग्न सकिन्छ। अछामबाट करिब ५० किलोमिटर टाढा पर्ने यो झरना विशेषगरी असारदेखि कात्तिक महिनासम्म स्थानीयदेखि अन्य जिल्लाका पर्यटकसम्मको रोजाइमा पर्ने गरेको स्थानीय रुपक थापाले बताए।
बडीमालिका नगरपालिकाले विरेखोला झरनालाई आन्तरिक पर्यटनको प्राथमिक गन्तव्यका रूपमा सूचीकरण गरिसकेको छ। नगरप्रमुख अमर खड्काका अनुसार झरनालाई अझ व्यवस्थित र आकर्षक बनाउन योजना अघि बढाइएको छ।
करिब २०० मिटर लामो झरनामा एक सिजनमा १ लाखभन्दा बढी पर्यटक पुग्ने अनुमान छ। बाजुरासहित अछाम र बझाङबाट पनि पर्यटकको उल्लेख्य उपस्थिति रहने गरेको छ।
झरनाको विकाससँगै स्थानीय व्यापारीहरूलाई आम्दानीको अवसर मिलेको छ। भौतिक पूर्वाधार थप विकास गर्न सकिए विदेशी पर्यटकसमेत आकर्षित गर्न सकिने र यसले स्थानीय अर्थतन्त्रमा सकारात्मक प्रभाव पार्ने स्थानीयको विश्वास छ।
