कैलाली: नेकपा (एमाले) निकट भातृ संगठन राष्ट्रिय युवा संघ नेपालको कैलाली जिल्ला कमिटीको १०औं अधिवेशनले हेमन्त साउदको अध्यक्षतामा ३६ सदस्यीय जिल्ला कार्यसमिति गठन गरेको छ ।
कार्यसमितिको उपाध्यक्षमा हिमान्शु साह, सचिवमा उत्तम महरा, सहसचिवमा कृष्ण थापा र छत्र गुरुङ तथा कोषाध्यक्षमा सरिता जैशी रहेका छन् । सदस्यहरूमा समिर सोडारी, प्रदीप थापा, यज्ञराज बिक, कृष्ण ढाट, गजेन्द्र बोगटी, ललित देवकोटा, सन्तोष चौधरी, दिनेश बिकलगायत युवाहरू चयन भएका छन् ।
राष्ट्रिय युवा संघ नेपाल देशभरका युवाहरूलाई संगठित गर्दै राष्ट्रनिर्माण र सामाजिक न्यायका लागि अग्रसर भैरहेको नेकपा (एमाले) निकट भातृ संगठन हो । संघले शिक्षा, रोजगारी, युवा उद्यमशीलता र सामाजिक जागरणमा महत्त्वपूर्ण भूमिका खेल्दै आएको छ।
नवनिर्वाचित अध्यक्ष हेमन्त साउदले अधिवेशनलाई सम्बोधन गर्दै युवाहरूको हक, अधिकार र अवसरको सुनिश्चितताका लागि संघको सक्रियता अझै बढाइने बताएका छन्। उनले भने, “युवाहरू परिवर्तनका संवाहक हुन्। उनीहरूको ऊर्जा र सिर्जनशीलतालाई उचित दिशामा उपयोग गरेर समाजलाई समृद्ध बनाउने जिम्मेवारी हामीले लिनुपर्छ। मेरो कार्यकालमा युवालाई आत्मनिर्भर बनाउन विशेष योजना ल्याइनेछ।”
साउदले महिला नेतृत्वको प्रोत्साहन, रोजगारी सिर्जना, उद्यमशीलताको विकास र सामाजिक न्यायलाई संघको प्रमुख प्राथमिकतामा राख्ने प्रतिबद्धता पनि व्यक्त गरे ।
१०औं जिल्ला अधिवेशनले संगठन सुदृढीकरण, पार्टीको आधार बलियो बनाउने र युवालाई नेतृत्वदायी भूमिकामा अघि बढाउने उद्देश्यले विभिन्न रणनीति तय गरेको छ ।
नवनिर्मित कार्यसमितिप्रति कैलालीका युवाहरूले ठूलो अपेक्षा राखेका छन् । संघले स्थानीयदेखि राष्ट्रिय स्तरसम्म युवाहरूको हितमा आवाज उठाउन, सीप विकासमा सहयोग गर्न र समाजमा सकारात्मक परिवर्तन ल्याउन प्रभावकारी भूमिका खेल्ने विश्वास गरिएको छ ।
