धनगढी – अछामको ऐतिहासिक मङ्गलसेन दरबार निर्माण पूरा नभएपछि ठेकेदार कम्पनीलाई १३ वर्षपछि स्पष्टीकरण सोधिएको छ ।
पटक पटक म्याद थप्दा पनि काममा ढिलासुस्ती गरेको भन्दै सघन सहरी तथा भवन निर्माण आयोजना डोटीले ठेकेदार कम्पनीलाई १५ दिने स्पष्टीकरण सोधेको हो ।
लिखित र मौखिक रूपमा निर्माण गर्न भनिए पनि कुनै चासो नदेखाएको हुँदा ठेक्का सम्झौता किन नतोड्ने ? मुनासिब कारणसहित १५ दिनभित्र स्वयम् ठेकेदार उपस्थित भएर स्पष्टीकरण बुझाउन जारी सूचनामा उल्लेख छ ।
विश्वसनीय आधारको स्पष्टीकरण नभएमा सम्झौताका सर्त, सार्वजनिक खरिद ऐन, २०६३ र नियमावली २०६४ बमोजिम ठेक्का सम्झौता रद्द गरी कानुनी कारबाही अगाडि बढाइने प्रकाशित सूचनामा उल्लेख छ ।
काठको अभावले निर्माण कार्यमा ढिलाइ भइरहेको ठेकेदारले बताउँदै आएका छन् । निर्माणको ठेक्का सम्झौताका क्रममा २०६५ असारबाट काम सुरु गरी २०६७ साल जेठमा सम्पन्न गर्नुपर्ने सम्झौतामा उल्लेख छ ।
