नेपाल प्रिमियर लिग (एनपीएल) अन्तर्गत आज दुई खेल हुँदैछन्। पहिलो खेलमा कर्णाली याक्स र पोखरा एभेन्जर्स आमनेसामने हुँदा दोस्रो खेलमा चितवन राइनोज र काठमाडौं गोर्खाजबीच प्रतिस्पर्धा हुनेछ।
कीर्तिपुरस्थित त्रिवि क्रिकेट मैदानमा हुने पहिलो खेल दिउँसो साढे १२ बजे सुरु हुनेछ। दोस्रो खेल साँझ ५ बजे सुरु हुने तालिका छ।
लिगको पछिल्लो अंकतालिकाअनुसार ७ अंक जोडेको लुम्बिनी लायन्स शीर्ष स्थानमा रहेको छ। पाँच खेल खेलेको लुम्बिनीले तीन जित, एक हार र एक खेलमा अंक बाँड्दै ७ अंक बनाएको हो।
६–६ अंकसहित काठमाडौं गोर्खाज दोस्रो र सुदूरपश्चिम रोयल्स तेस्रो स्थानमा छन्। त्यस्तै, ५ अंकसहित चितवन राइनोज चौथो स्थानमा रहँदा जनकपुर बोल्ट्स, कर्णाली याक्स र विराटनगर किंग्स समान ४ अंकसहित क्रमशः पाँचौँ, छैटौँ र सातौँ स्थानमा छन्।
चार खेल खेलेको पोखरा एभेन्जर्सले अहिलेसम्म जितको खाता खोल्न सकेको छैन। टोली अंकविहीन रहँदै तालिकाको अन्तिम स्थानमा छ।
यसअघि हिजो कुनै खेल भएको थिएन। भाइटीकाका दिन पर्सि बुधबार पनि प्रतियोगिताअन्तर्गत खेल सञ्चालन नहुने तालिका छ।
भाइटीकाको भोलिपल्ट बिहीबार भने दुई खेल हुनेछन्। पहिलो खेलमा विराटनगर किंग्स र पोखरा एभेन्जर्स भिड्दा दोस्रो खेलमा कर्णाली याक्सले लुम्बिनी लायन्ससँग प्रतिस्पर्धा गर्नेछ।

