धनगढी- नेकपा (एमाले) अछामका नेता दीपक साउँदले पार्टीको केन्द्रीय कमिटी सदस्यको शपथ लिएका छन्।
एमालेको विधानको धारा ६० को उपधारा (क) अनुसार केन्द्रीय कमिटी सदस्यको जिम्मेवारी पाएका साउँदले शुक्रबार शपथग्रहण गरेका हुन्।
साउँदले शपथका क्रममा मार्क्सवाद–लेनिनवाद र जनताको बहुदलीय जनवादलाई मार्गदर्शक सिद्धान्तका रूपमा आत्मसात गर्दै पार्टी, राष्ट्र र क्रान्तिको हितमा निरन्तर सक्रिय र समर्पित रहने प्रतिबद्धता व्यक्त गरेका छन्।
उनले पार्टीको सिद्धान्त, कार्यक्रम र नीतिलाई दृढताका साथ अनुसरण गर्दै पार्टी विधानलाई इमानदारीपूर्वक पालना गर्ने तथा पदमा रहे वा नरहे पनि पार्टीको गोपनीयता र एकता जोगाउँदै स्वच्छ एवं नैतिक आचरणयुक्त जीवन बिताउने प्रतिबद्धता पनि जनाएका छन्।
साउँद तत्कालीन नेकपा (माओवादी)का प्रभावशाली नेताका रूपमा अछाममा लामो समय सक्रिय थिए। उनी २०७० सालको संविधानसभा निर्वाचनमा अछाम–१ बाट तत्कालीन माओवादीका उम्मेदवारसमेत बनेका थिए। पछि माओवादी छाडेर प्रगतिशील लोकतान्त्रिक पार्टीमा आबद्ध भएका साउँद पछिल्लो समय एमालेमा समाहित भएका हुन्।
एमालेको पछिल्लो केन्द्रीय कमिटी बैठकबाट पार्टीमा समायोजन भएका नेताहरूमध्ये साउँदलाई अछामबाट केन्द्रीय सदस्य बनाइएको थियो। एमालेले समायोजन भएका विभिन्न समूहबाट १३ जनालाई केन्द्रीय सदस्य बनाएको जनाएको छ।
