रमित ओली, कैलारी – कैलाली कैलालीको कैलारी गाउँपालिकामा राष्ट्रिय स्वतन्त्र पार्टी (रास्वपा), नेपाली कांग्रेसलगायत विभिन्न राजनीतिक दल परित्याग गरी ७६ जना कार्यकर्ता नागरिक उन्मुक्ति पार्टी नेपालमा प्रवेश गरेका छन्।
राष्ट्रिय स्वतन्त्र पार्टीका कैलाली जिल्ला संगठन विभाग उपप्रमुख श्रवण चौधरीलगायत विभिन्न दलमा आबद्ध नेता तथा कार्यकर्ता उन्मुक्तिमा प्रवेश गरेका हुन् ।
नागरिक उन्मुक्ति पार्टी नेपाल, कैलारी गाउँपालिकाका कार्यवाहक अध्यक्ष भीष्मराज चौधरीको सभापतित्वमा आयोजित पार्टी प्रवेश कार्यक्रममा उनीहरू पार्टीमा आबद्ध भएका जनाइएको छ ।
कार्यक्रममा पार्टीका संरक्षक रेशमलाल चौधरी प्रमुख अतिथिका रूपमा उपस्थित थिए। त्यस्तै, पार्टी अध्यक्ष कबिर सोप र पूर्वसांसद कृष्ण चौधरी विशिष्ट अतिथिका रूपमा सहभागी थिए।
कार्यक्रमको सञ्चालन चन्द्र चौधरीले गरेका थिए। पार्टी प्रवेश कार्यक्रममा नागरिक उन्मुक्ति पार्टी नेपालका विभिन्न तहका नेता तथा कार्यकर्ताको उत्साहजनक उपस्थिति रहेको थियो।
विभिन्न राजनीतिक दलमा आबद्ध रहेका ७६ जना कार्यकर्ताको पार्टी प्रवेशलाई नागरिक उन्मुक्ति पार्टी नेपालले कैलारी गाउँपालिकामा आफ्नो संगठन विस्तारका रूपमा लिएको छ।
