बझाङ: नेकपा (एमाले) बझाङ तथा खप्तडछान्ना गाउँपालिकाका सक्रिय र प्रभावशाली नेताका रूपमा परिचित कलक खत्री आगामी स्थानीय तह निर्वाचनमा गाउँपालिका अध्यक्ष पदका सम्भावित उम्मेदवारका रूपमा व्यापक चर्चामा रहेका छन् । स्थानीय तहमा पार्टी संगठन विस्तार, कार्यकर्ता परिचालन र जनतासँगको निरन्तर सम्पर्कका कारण खत्रीलाई एमालेभित्र मात्र होइन, समग्र स्थानीय राजनीतिमा पनि प्रभावशाली नेताका रूपमा हेरिने गरिएको छ ।
२०७९ सालको स्थानीय तह निर्वाचनमा खत्री गाउँपालिका अध्यक्ष पदका लागि एमालेबाट सिफारिसमा परेका थिए । तर अन्तिम समयमा पार्टीको निर्णयअनुसार उनले टिकट पाउन सकेनन् । त्यसबेला पनि धेरै कार्यकर्ताले उनलाई सक्षम उम्मेदवारका रूपमा लिएका थिए । टिकट नपाएपछि पनि उनले पार्टीप्रतिको प्रतिबद्धता कायम राख्दै संगठन निर्माण, पार्टीका कार्यक्रम र जनसम्पर्कलाई निरन्तरता दिएका थिए ।
आगामी निर्वाचनको चर्चा सुरु भएसँगै खप्तडछान्नामा खत्रीको नाम पुनः अध्यक्ष पदका लागि प्रमुख रूपमा उठ्न थालेको छ । स्थानीय स्तरमा उनको सक्रियता, विकास निर्माणप्रतिको चासो तथा कार्यकर्ताबीचको लोकप्रियताका कारण उनी एमालेका बलिया आकांक्षीमध्ये एक रहेको चर्चा भइरहेको छ । पार्टीभित्र पनि उनलाई सक्षम नेतृत्वका रूपमा हेर्ने कार्यकर्ताको संख्या उल्लेख्य रहेको बताइन्छ ।
स्थानीय राजनीतिक वृत्तमा खत्री उम्मेदवार बनेमा प्रतिस्पर्धा रोचक हुने विश्लेषण भइरहेको छ । यद्यपि, उम्मेदवार चयन सम्बन्धी अन्तिम निर्णय भने नेकपा (एमाले) को आधिकारिक प्रक्रिया र निर्णयबाट मात्रै हुने भएकाले अहिले नै कसले टिकट पाउने भन्ने विषय टुङ्गो लागिसकेको छैन ।
खप्तडछान्ना गाउँपालिकाको राजनीतिक माहोल बिस्तारै तात्न थालेको अवस्थामा कलक खत्रीको सम्भावित उम्मेदवारीले स्थानीय राजनीतिमा नयाँ बहस र चासो सिर्जना गरेको छ । आगामी निर्वाचनमा एमालेले कसलाई उम्मेदवार बनाउने भन्ने विषयलाई लिएर कार्यकर्ता र स्थानीयवासीको ध्यान केन्द्रित भएको देखिन्छ ।
