बझाङ- बझाङका वनजंगलबाट संकलन गरिएका जडीबुटी तथा अन्य वन पैदावार निकासीबाट आर्थिक वर्ष २०८२/८३ मा १ करोड २२ लाख ३ हजार ५ सय ५ रुपैयाँ राजस्व संकलन भएको छ।
डिभिजन वन कार्यालय बझाङका अनुसार सबैभन्दा बढी यार्सागुम्बाबाट ७५ लाख १९ हजार ३ सय ६० रुपैयाँ राजस्व उठेको छ। ६०० किलो संकलन गर्ने लक्ष्य राखिए पनि यस वर्ष २४२ किलो मात्र यार्सागुम्बा निकासी भएको थियो। यार्सागुम्बाको निकासी दस्तुर प्रतिकिलो ३१ हजार रुपैयाँ तोकिएको छ।
यस्तै, झ्याउबाट २ लाख ५० हजार, रातो च्याउबाट २ लाख १८ हजार २ सय ५०, चुर्थो (दारुहल्दी) बाट २ लाख, सल्लो आँख्लाबाट २ लाख ५० हजार, सेतकचिनीबाट २ लाख ५० हजार तथा सिलाजितबाट १ लाख २२ हजार ५ सय रुपैयाँ राजस्व संकलन भएको कार्यालयले जनाएको छ।
त्यसैगरी कटुकी, जटामसी, पाषाणभेद, बनसुडो, तेजपात, टिमुर, अमला, लोक्ता, कालादाना, विषफेज, चिराइतो, अल्लो, बनलसुन, जंगली मह, सिस्नु, गुच्ची च्याउलगायत गरी करिब २९ प्रजातिका वन पैदावार निकासी भएका छन्।
कार्यालय प्रमुख शम्भु प्रसाद तिवारीका अनुसार गत वर्षको तुलनामा यस वर्ष राजस्व संकलन घटेको छ। साथै, पाँचऔँले लगायत लोपोन्मुख अवस्थामा पुगेका केही बहुमूल्य जडीबुटीको संरक्षणका लागि संकलनमा रोक लगाइएको पनि उनले जानकारी दिए।
Advertisement
