धनगढी- बझाङमा सामुदायिक सशक्तीकरणका लागि द्रुत कार्य ( रेश) नेपालको वार्षिक साधारण सभा सम्पन्न भएको छ ।
सनिवार केदारस्यूँ गाउँपालिकाको सभाहलमा रेश नेपाल संस्थाको ५ औँ वार्षिक साधारण सभा सम्पन्न भएको हो ।
संस्थाकी अध्यक्ष निशा धामीको अध्यक्षतामा भएको साधारणसभा कार्यक्रममा वार्षिक प्रतिवेदन प्रस्तुत, सदस्य वितरण, संस्थाको अवस्था, उदेश्य लगायतका विषयमा अन्तरक्रिया गरिएको थियोे । साधारणसभा कार्यक्रम वार्षिक प्रतिवेदन संस्थाकी उपाध्यक्ष जानकी बोहराले प्रस्तुति गरेकि थिइन् ।
यस्तै कार्यक्रममा साधारण सदस्यता तथा आजीवन सदस्यता वितरण समेत गरिएको छ । संस्थाको सदस्यता १ सय भन्दाबढीले लिएको संस्थाकी अध्यक्ष धामीले जानकारी दिइन् ।
गाउँपालिका अध्यक्ष गणेशबहादुर बोहरा प्रमुख अतिथि रहेको उक्त कार्यक्रममा संस्था प्रति आस्थावान समाजसेवी बुद्धिजीवी, संस्थाका पदाधिकारी लगायतको उपस्थिति रहेको थियोे ।
यसैबीच कार्यक्रममा आगामी कार्ययोजनाबारेमा पनि छलफल गरिएको जनाइएको छ ।
संस्था महिला, दलित, जनजाति, विपन्न तथा सीमान्तकृत समुदायको सशक्तीकरण र क्षमता विकासका लागि विभिन्न जनहितकारी कार्यक्रम गर्न स्थापना गरिएको अध्यक्ष धामीको भनाइ छ । उनलेे भनिन् संस्थाले शिक्षा, स्वास्थ्य, सीपमूलक तालिम तथा स्वरोजगार प्रवर्द्धनसँगै कृषि विकास र वातावरण संरक्षणका क्षेत्रमा समेत काम गर्दै आएको छ।
त्यसैगरी, सामाजिक न्याय र सुशासन प्रवर्द्धन गर्नुका साथै अनाथ, असहाय तथा फरक क्षमता भएका व्यक्तिहरूको समग्र उत्थान र जीवनस्तर सुधारका लागि आवश्यक कार्यक्रम सञ्चालन गर्ने संस्थाको उद्देश्य रहेको छ।
