काठमाडौं- प्रधानमन्त्री वालेन्द्र शाहले आफ्नो सचिवालयमा २७ जनालाई नियुक्त गरेको खुलेको छ। प्रमुख प्रतिपक्षी नेपाली कांग्रेसकी सांसद सीता थपलिया (उर्मिला) ले सोधेको लिखित प्रश्नको जवाफ दिँदै प्रधानमन्त्री तथा मन्त्रिपरिषद्को कार्यालयले सचिवालयमा गरिएको नियुक्तिको विवरण सार्वजनिक गरेको हो।
प्रधानमन्त्रीको सचिवालयमा नियुक्त भएकामध्ये मुख्य सल्लाहकार कुमार बेन र राजनीतिक सल्लाहकार असिम शाहलाई नेपाल सरकारको मन्त्रीसरह सेवासुविधा दिइएको छ। त्यस्तै, नीति, प्रशासन तथा सुशासन सल्लाहकार र सूचना तथा सञ्चार प्रविधि सल्लाहकार गरी दुई जनाले राज्यमन्त्रीसरह सेवा–सुविधा पाउने व्यवस्था गरिएको छ।
मन्त्री तथा राज्यमन्त्रीसरह सेवासुविधा पाउने सचिवालयका सदस्यलाई प्रधानमन्त्री कार्यालयले गाडी र चालक सुविधासमेत उपलब्ध गराउने गरेको छ।
सांसद थपलियाले प्रधानमन्त्रीको सचिवालयमा कति जना कुन तह र स्तरको सेवासुविधासहित कुन कानुनअन्तर्गत नियुक्त भएका छन् भन्ने प्रश्न गरेकी थिइन्। जवाफमा प्रधानमन्त्री कार्यालयले सल्लाहकारतर्फ मन्त्रीसरह सुविधा पाउने गरी दुई जना र राज्यमन्त्रीसरह सुविधा पाउने गरी दुई जनाको नियुक्ति भएको जनाएको छ।
प्रधानमन्त्री कार्यालयका अनुसार प्रधानमन्त्रीको सचिवालयमा अधिकतम ४८ जनासम्म राख्न सकिने व्यवस्था रहेको छ। यद्यपि, सचिवालयमा भएको नियुक्तिका कारण राज्यकोषमा पर्ने आर्थिक भार र प्रधानमन्त्रीको सचिवालयले प्रयोग गर्ने गाडीको संख्याबारे भने जवाफ नदिइएको भन्दै सांसद थपलियाले असन्तुष्टि जनाएकी छन्।
यसैबीच, प्रधानमन्त्री शाहले मन्त्रीहरूलाई समेत सल्लाहकार तथा सचिवालयमा १३ जनासम्म नियुक्त गर्न पाउने गरी दरबन्दी स्वीकृत गराएको जनाइएको छ। प्रधानमन्त्री तथा मन्त्रिपरिषद्को कार्यालयमा २७ जनालाई नियुक्ति दिएका शाहले मन्त्रीहरूलाई पनि १३ जनासम्म सल्लाहकार तथा सचिवालय सदस्य राख्न पाउने व्यवस्था गरेका हुन्।
