बझाङ- बझाङको जयपृथ्वी नगरपालिका-१० चैनपुरस्थित एक घरमा जुवातास खेलिरहेको अवस्थामा प्रहरीले ९ जनालाई पक्राउ गरेको छ।
जिल्ला प्रहरी कार्यालय बझाङका अनुसार आइतबार साँझ ५ बजे प्राप्त गोप्य सूचनाका आधारमा प्रहरी निरीक्षक उपेन्द्र तिमिल्सैनको नेतृत्वमा जिल्ला प्रहरी कार्यालयबाट ९ जना र वडा प्रहरी कार्यालयबाट प्रहरी नायब निरीक्षक बहादुर सिंह धामीको नेतृत्वमा ६ जना गरी १५ सदस्यीय प्रहरी टोली खटिएको थियो।
प्रहरी टोलीले चैनपुरस्थित प्रकाश विकको घरमा छापा मारेर जुवातास खेलिरहेका ९ जनालाई नियन्त्रणमा लिएको हो।
पक्राउ पर्नेमा जयपृथ्वी नगरपालिका-१० का लक्ष्मी सुनार (६८), लोकेन्द्र विक (३८) र प्रकाश विक (३२), मष्टा गाउँपालिका-७ का ठिंका द्वाल (५७) र रमेश जेठारा (३८), मष्टा गाउँपालिका-५ का धनराज बोहरा (४८), हुम्लाको सार्केगाड गाउँपालिकाका दोर्जे फरेडा (४०) तथा सुर्मा गाउँपालिका-२ का ऐनबहादुर बोहरा (४०) रहेका छन्।
प्रहरीले उनीहरूको साथबाट नगद ५३ हजार ९९० रुपैयाँ, खुला तासका ९ गड्डी र नखोलिएको १ बण्डल तास बरामद गरेको जनाएको छ।
पक्राउ परेका सबैलाई जिल्ला प्रहरी कार्यालय बझाङको हिरासतमा राखी जुवा सम्बन्धी कसुरमा थप अनुसन्धान भइरहेको प्रहरीले जनाएको छ।
