सुदूरपश्चिमका मुख्यमन्त्री शाहद्वारा एमालेका तीन मन्त्री र एक राज्यमन्त्री बर्खास्त

धनगढी- सुदूरपश्चिम प्रदेशका मुख्यमन्त्री कमलबहादुर शाहले सरकारमा सहभागी नेकपा (एमाले)का तीन मन्त्री र एक राज्यमन्त्रीलाई पदबाट बर्खास्त गरेका छन्।
बर्खास्त हुनेमा भौतिक पूर्वाधार विकासमन्त्री सुरेन्द्र पाल, भूमि व्यवस्था, कृषि तथा सहकारीमन्त्री वीरबहादुर थापा, आन्तरिक मामिला तथा कानुनमन्त्री हिरा सार्की तथा भौतिक पूर्वाधार राज्यमन्त्री निर्मला साउद रहेका छन्।
कांग्रेस नेतृत्वको सरकारमा सहभागी एमालेसँगको सहकार्यमा दरार आएपछि मुख्यमन्त्री शाहले यो निर्णय गरेका हुन्।
यसअघि असार १ गते प्रदेश सरकारले आगामी आर्थिक वर्षको बजेट प्रदेशसभामा प्रस्तुत गरेको थियो। तर, आफ्नै सरकारद्वारा ल्याइएको बजेटविरुद्ध एमालेका छ जना प्रदेशसभा सदस्यले छ मन्त्रालयको बजेटमा खर्च कटौती प्रस्ताव दर्ता गरेका थिए। त्यसपछि सरकार–एमाले सम्बन्ध थप तनावपूर्ण बनेको थियो।
मुख्यमन्त्री शाहको पछिल्लो निर्णयसँगै सुदूरपश्चिम प्रदेशको सत्ता समीकरण नयाँ मोडमा पुगेको छ।