बझाङ- बझाङमा बसेको जिल्ला विपद् व्यवस्थापन समितिको बैठकले केदारस्युँ गाउँपालिका-७ सुँगरेमा भएको जीप दुर्घटना प्रति दु:ख व्यक्त गर्दै विभिन्न निर्णय गरेको छ । आइतबार बसेको सर्वदलीय बैठकले जिल्ला स्थित स्थानीय तह, सरकारी तथा गैरसरकारी संस्थाले आर्थिक सहयोग लगायतका निर्णय गरेको हो ।
जिल्लाका सबै स्थानीय तहले कम्तीमा दुई लाख ५० हजार रुपैयाँ आर्थिक सहयोग उपलब्ध गराउने निर्णय भएको छ। साथै, जिल्लास्थित राजनीतिक दल, उद्योग वाणिज्य संघ, गैरसरकारी संस्था, पत्रकार महासंघ तथा राष्ट्रसेवक कर्मचारीलाई पनि स्वेच्छिक आर्थिक सहयोग गर्न अनुरोध गरिएको छ। उक्त सहयोगको समन्वय दुर्गाथली गाउँपालिकाले गर्ने निर्णय भएको छ।
त्यसैगरी, घाइतेहरूको उपचारका लागि आवश्यक थप सहयोग उपलब्ध गराइदिन गृह मन्त्रालय तथा सुदूरपश्चिम प्रदेशको आन्तरिक मामिला तथा कानुन मन्त्रालयसँग अनुरोध गर्ने निर्णय पनि गरिएको छ।
गम्भीर घाइतेमध्ये दुई जनालाई काठमाडौं र पाँच जनालाई नेपालगञ्ज पठाएर उपचार गराउँदा हेलिकोप्टर उडानसहित ठूलो आर्थिक भार परेको उल्लेख गर्दै यस्तो निर्णय गरिएको जनाइएको छ ।
त्यस्तै बैठकले मनसुन सक्रिय भएसँगै अविरल वर्षा, बाढी, नदी कटान र पहिरोका कारण सडकहरू जोखिममा परेकाले जिल्लाका सबै स्थानीय तहलाई आफ्नो क्षेत्रभित्रका सडकको जोखिमयुक्त मोड सुधार, मर्मत-सम्भार तथा आवश्यक पूर्वतयारी तत्काल गर्न निर्देशन दिने निर्णयसमेत गरेको छ।
बैठकमा सहभागी सर्वदलीय प्रतिनिधिहरूले विपद्को समयमा सबै पक्षबीच समन्वय र सहकार्यलाई थप प्रभावकारी बनाउने प्रतिबद्धता व्यक्त गरेका थिए।
