हालसम्म देशभर ३१.३८ प्रतिशत क्षेत्रमा धान रोपाइँ कार्य सम्पन्न्न भएको छ । क्षेत्रमा रोपाइँ धान क्षेत्रमा रोपाइँ सम्पन्न भएको छ । देशका धान रोपाइँ हुने कुल १३ लाख ७० हजार ६२ हेक्टर क्षेत्रफलमध्ये असार २२ गतेसम्म ४ लाख ४३ हजार ५९५.०९ हेक्टर अर्थात् ३१.३८ प्रतिशत क्षेत्रमा रोपाइँ सम्पन्न भएको हो । कृषि विभागका अनुसार गत वर्ष यही अवधिसम्म ४५ प्रतिशत क्षेत्रमा रोपाइँ सकिएको थियो।
सुदूरपश्चिममा सबैभन्दा बढी, मधेशमा सबैभन्दा कम
प्रदेशगत विवरणअनुसार सुदूरपश्चिममा सबैभन्दा बढी ५७.९ प्रतिशत अर्थात् ८९ हजार ७४२ हेक्टर क्षेत्रमा धान रोपाइँ सम्पन्न भएको छ। यस प्रदेशमा यस वर्ष १ लाख ५४ हजार ९५० हेक्टर क्षेत्रमा धान खेती हुने अनुमान गरिएको छ। गत वर्ष यही अवधिसम्म सुदूरपश्चिममा करिब ८३ प्रतिशत क्षेत्रमा रोपाइँ सकिएको थियो।
विपरीत रूपमा, मधेश प्रदेशमा रोपाइँको गति सबैभन्दा सुस्त रहेको छ। कुल ३ लाख ८५ हजार ९३३ हेक्टर धानखेतीयोग्य जमिनमध्ये हालसम्म ६० हजार ३४५ हेक्टर अर्थात् १५.६ प्रतिशत क्षेत्रमा मात्र रोपाइँ भएको छ। गत वर्ष असार २२ सम्म मधेशमा २५ प्रतिशत क्षेत्रमा रोपाइँ सम्पन्न भएको थियो।
अन्य प्रदेशको अवस्था
कृषि विभागका अनुसार अन्य प्रदेशमा धान रोपाइँको अवस्था यसप्रकार छः
धान खेती हुने क्षेत्रफलका हिसाबले मधेश प्रदेश सबैभन्दा अगाडि छ, जहाँ ३ लाख ८५ हजार ९३३ हेक्टर क्षेत्रमा धान खेती गरिन्छ। सबैभन्दा कम क्षेत्रफल भने कर्णाली प्रदेशमा रहेको छ, जहाँ ४३ हजार २९० हेक्टरमा धान खेती हुन्छ।
मनसुन सक्रिय भएसँगै रोपाइँले गति लिँदै
गत वर्ष पर्याप्त वर्षा नहुँदा आकाशे पानीमा निर्भर किसानले समयमै रोपाइँ गर्न सकेका थिएनन्। केही स्थानमा भदौको दोस्रो सातासम्म पनि धान रोपाइँ जारी रहेको थियो।
यस वर्ष पनि सुरुमा मनसुन कमजोर हुँदा विशेषगरी मधेश प्रदेशमा रोपाइँ प्रभावित भएको थियो। तर पछिल्ला दिनमा मनसुन सक्रिय भएसँगै रोपाइँको गति बढ्न थालेको छ। सिँचाइ सुविधा र पर्याप्त पानी भएका क्षेत्रमा किसान व्यस्त रूपमा धान रोपिरहेका छन् भने सिँचाइ सुविधा नभएका तथा पानी अभाव भएका क्षेत्रमा भने रोपाइँ अझै अपेक्षित रूपमा अघि बढ्न सकेको छैन।
