धनगढी- राष्ट्रिय स्वतन्त्र पार्टी (रास्वपा) सुदूरपश्चिम प्रदेश अधिवेशनमा गणेश बहादुर बोहराले सह–महामन्त्री पदमा पुनः उम्मेदवारी घोषणा गरेका छन्।
कुनै राजनीतिक पृष्ठभूमिबाट नआएका बोहरा पार्टी स्थापनाकालदेखि नै सुदूरपश्चिम प्रदेशका संस्थापक सदस्यका रूपमा सक्रिय रहँदै आएका छन्। प्रदेशका नौवटै जिल्लामा संगठन विस्तार तथा सुदृढीकरणका लागि उनले महत्वपूर्ण भूमिका खेलेको पार्टी वृत्तमा चर्चा छ।
सुदूरपश्चिममा करिब ८–१० जनाबाट सुरु भएको संगठनलाई आज करिब ५० हजार सदस्य तथा समर्थकसम्म विस्तार गर्न योगदान पुर्याउने नेतृत्वमध्ये बोहरालाई पनि एक मानिन्छ। संगठन निर्माणमा निरन्तर खटिएका उनी कम बोल्ने, इमान्दार, जिम्मेवार र मेहनती नेताका रूपमा परिचित छन्।
पेशाले कृषक तथा यातायात व्यवसायी रहेका बोहरा व्यवहारिक अनुभव, संगठनप्रतिको निष्ठा र कार्यशैलीका कारण कार्यकर्तामाझ लोकप्रिय मानिन्छन्।
संगठनलाई अझ सशक्त र प्रभावकारी बनाउने लक्ष्यसहित बोहरा पुनः सह–महामन्त्री पदको प्रतिस्पर्धामा उत्रिएका हुन्।
Advertisement
