धनगढी- विप्लव नेतृत्वको नेपाल कम्युनिष्ट पार्टी नेकपा माओवादीका नेता कमल थापाले पार्टीको सदस्यता तथा सम्पूर्ण संगठनात्मक जिम्मेवारीबाट राजीनामा दिएका छन्।
बिहीबार सार्वजनिक गरेको लामो राजीनामा पत्रमार्फत थापाले पार्टीको वैचारिक दिशा, कार्यनीति तथा निर्णय प्रक्रियाप्रति असहमति जनाउँदै राजीनामा दिएको जानकारी दिएका हुन्। उनले पछिल्लो समय पार्टीका केन्द्रीय समितिका बैठकबाट पारित कार्यनीति तथा निर्णयहरूमा देखिएको अस्पष्टता, वैचारिक विचलन र आत्मरतिमा आधारित निर्णय प्रक्रियाले आफूलाई गम्भीर रूपमा चिन्तित बनाएको उल्लेख गरेका छन्।
थापाले पार्टीभित्र विभिन्न जिम्मेवारी निर्वाह गर्दै जिल्ला पार्टी सचिवालय सदस्य, विभिन्न मोर्चाका तीन जिल्लाको इन्चार्ज, केन्द्रीय सचिवालय सदस्य तथा अखिल (समाजवादी) राष्ट्रिय सम्मेलन आयोजक समिति सदस्यसम्मको भूमिका निभाएका थिए।
राजीनामा पत्रमा उनले आफू पार्टीबाट अलग भए पनि न्याय, समानता, स्वतन्त्रता र मानव मुक्तिको आदर्शबाट भने अलग नभएको बताएका छन्। “आज म पार्टी छोड्दै छु, तर क्रान्तिको सपना छोडेको छैन,” उनले पत्रमा उल्लेख गरेका छन्।
थापाले आजकै मितिदेखि नेपाल कम्युनिस्ट पार्टी (माओवादी) तथा मातहतका सबै संगठनात्मक जिम्मेवारी, सदस्यता र पदबाट राजीनामा दिएको र आफू कुनै पनि राजनीतिक दलको सदस्य नरहेको जानकारी गराएका छन्।
उनले संघर्षका सहयात्रीहरूप्रति सम्मान व्यक्त गर्दै विचार र बाटो फरक भए पनि न्यायपूर्ण समाज निर्माणको साझा सपना कायम रहोस् भन्ने शुभकामना व्यक्त गरेका छन्। राजीनामा पत्रको अन्त्यमा उनले “कहिलेकाहीँ एउटा यात्रा समाप्त गर्नु पराजय होइन, सत्यप्रति इमानदार रहन गरिएको साहसी निर्णय हो” भन्दै आफ्नो निर्णयलाई अन्तरआत्माको आवाजका रूपमा प्रस्तुत गरेका छन्।
Advertisement
