सुदूरपश्चिममा १६ लाखभन्दा बढी पुस्तक वितरणको तयारी, ढुवानी तीव्र

धनगढी- सुदूरपश्चिम प्रदेशमा आगामी शैक्षिकसत्र २०८३ का लागि पाठ्यपुस्तक बिक्रीवितरण कार्य तीव्र रूपमा अगाडि बढाइएको छ। प्रादेशिक कार्यालयका अनुसार स्थानीय पुस्तक बिक्रेतामार्फत वितरण भइरहेको छ भने हालसम्म करिब रु ३ करोड ७४ लाख ७० हजार बराबरको कारोबार भइसकेको छ।
कार्यालय प्रमुख निर्मल कुमार यादवका अनुसार बाजुरा, दार्चुला, अछाम र बझाङ लगायत पहाडी जिल्लामा पुस्तक ढुवानी सम्पन्न भइसकेको छ। चैत ३० गतेभित्र प्रदेशका सबै नौ जिल्लामा पुस्तक पुर्‍याउने लक्ष्य राखिएको छ। दुर्गम क्षेत्रमा समेत ढुवानीलाई तीव्रता दिइएको र शैक्षिकसत्र सुरु हुनुअघि नै सबै स्थानमा पुस्तक पुग्ने विश्वास व्यक्त गरिएको छ।
केन्द्रले आगामी वर्षका लागि करिब साढे १६ लाख थान पाठ्यपुस्तक वितरण गर्ने लक्ष्य लिएको छ। हाल कक्षा ३, ५ तथा ६ देखि १२ सम्मका पुस्तक बिक्रीवितरण भइरहेका छन्।
चालु शैक्षिकसत्रमा सुदूरपश्चिम प्रदेशमा १६ लाख २९ हजार २६३ थान पुस्तक बिक्री भई करिब रु २१ करोड ९३ लाखभन्दा बढीको कारोबार भएको जनाइएको छ। समयमै आपूर्ति सुनिश्चित गर्न ढुवानी तथा वितरण कार्यलाई प्राथमिकतामा राखिएको छ।