पन्जाब किङ्सको लगातार दोस्रो जित, चेन्नई ५ विकेटले पराजित

इन्डियन प्रिमियर लिग (आईपीएल) २०२६ अन्तर्गत शुक्रबार राति सम्पन्न खेलमा पन्जाब किङ्सले चेन्नई सुपर किङ्सलाई ५ विकेटले पराजित गर्दै लगातार दोस्रो जित दर्ता गरेको छ।
२१० रनको लक्ष्य पछ्याएको पन्जाबले १८.४ ओभरमा ५ विकेट गुमाएर सहज जित निकालेको हो। कप्तान श्रेयस अय्यरले २९ बलमा ५० रन बनाउँदै टोलीको जितमा महत्वपूर्ण योगदान दिए। उनले ४ चौका र ३ छक्का प्रहार गरे।
चेन्नईका लागि म्याट हेनरी र अन्शुल कम्बोजले समान २–२ विकेट लिए।
यसअघि टस हारेर पहिले ब्याटिङ गरेको चेन्नईले २० ओभरमा ५ विकेट गुमाउँदै २०९ रन बनाएको थियो। आयुष म्हात्रेले ४३ बलमा ७ चौका र ५ छक्कासहित ७३ रनको उत्कृष्ट पारी खेले। शिवम दुबे ४५ रनमा अविजित रहे भने सरफराज खानले ३२ र कप्तान रुतुराज गायकवाडले २८ रन जोडे।
सन्जु सामसन ७ रनमै आउट भएपछि म्हात्रे र गायकवाडबीच ९६ रनको महत्वपूर्ण साझेदारी बनेको थियो। त्यसपछि सरफराज र दुबेको प्रभावकारी फिनिसिङले चेन्नईलाई बलियो योगफलसम्म पुर्‍याएको थियो।
पन्जाबका विजयकुमार वाइशाकले २ विकेट लिए भने जेभियर बार्टलेट, मार्को यानसेन र युजभेन्द्र चहलले समान १–१ विकेट हात पारे।
लगातार दोस्रो जितसँगै पन्जाब २ खेलबाट ४ अंक जोड्दै शीर्षस्थानमा उक्लिएको छ। उता चेन्नई भने लगातार दोस्रो हारपछि अंकविहीन रहँदै तालिकाको पुछारमा झरेको छ।