धनगढी- नेपाली कम्युनिस्ट पार्टी (नेकपा) सुदूरपश्चिम प्रदेश संसदीय दलले प्रदेश सभाको बैठक एक हप्ताभित्र आह्वान गर्न सरकारलाई अल्टिमेटम दिएको छ।
संसदीय दलका नेता खगराज भट्टले बुधबार मुख्यमन्त्रीलाई ध्यानाकर्षण पत्र बुझाउँदै सात दिनभित्र प्रदेश सभाको नियमित अधिवेशन नबोलाए कडा कदम चाल्ने चेतावनी दिएका हुन्। मुख्यमन्त्री तथा मन्त्रिपरिषद्को कार्यालयलाई सम्बोधन गरिएको उक्त पत्रमा प्रदेश सरकारको कार्यशैलीप्रति गम्भीर असन्तुष्टि व्यक्त गरिएको छ।
पत्रमा प्रदेश सभाको छैटौँ अधिवेशन अन्त्य भएको लामो समय बितिसक्दा पनि हिउँदे अधिवेशन आह्वान नगरिएकोप्रति आपत्ति जनाइएको छ। साथै चालू आर्थिक वर्षको वार्षिक बजेट तथा कार्यक्रम कार्यान्वयनको अवस्था अत्यन्त न्यून रहेको तथा सरकारले विकास निर्माणका काममा पर्याप्त ध्यान नदिएको आरोप लगाइएको छ।
त्यसैगरी प्रदेश सरकारले सुशासन कायम गर्न नसकेको, मुख्यमन्त्रीमाथि लागेको भ्रष्टाचारसम्बन्धी गम्भीर आरोपको छानबिन प्रक्रिया अघि नबढेको पनि पत्रमा उल्लेख गरिएको छ।
प्रदेश सभा सचिवालयमा दर्ता भएका महत्त्वपूर्ण विधेयकहरू पारित गर्ने प्रक्रिया अघि नबढ्दा कानुन निर्माणको काम समेत ठप्प भएको नेकपाको भनाइ छ। साथै सरकारले जनसरोकारका कामभन्दा आफ्ना कार्यकर्तालाई खुसी पार्न राजनीतिक नियुक्तिमा केन्द्रित भएको आरोप पनि लगाइएको छ।
संसदीय दलका नेता भट्टद्वारा हस्ताक्षरित पत्रमा जननिर्वाचित सांसदहरूले सरकारका काम कारबाहीबारे प्रश्न गर्ने मुख्य थलो संसद् नै रहेको उल्लेख गर्दै एक हप्ताभित्र प्रदेश सभाको नियमित अधिवेशन आह्वान गर्न जोडदार माग गरिएको छ। उक्त पत्रको बोधार्थ प्रदेश सभामुखलाई समेत दिइएको छ।
सरकारले संसद् छलेर मनोमानी गरिरहेको आरोप लगाउँदै प्रतिपक्ष दलहरूले पछिल्लो समय सदन बोलाउन निरन्तर दबाब दिँदै आएका छन्।
Advertisement
