बझाङ- हालै सम्पन्न प्रतिनिधि सदस्य निर्वाचनपछि अमर सिंह महर ले आफूविरुद्ध अन्तरघातको आरोप लगाइएको भन्दै त्यसको सत्यतथ्य छानबिन गर्न माग गरेका छन्।
महरले सामाजिक सञ्जालमार्फत सार्वजनिक गरेको विज्ञप्तिमा फागुन २१ गतेको निर्वाचनमा आफूले दिनरात खटेर पार्टीका उम्मेदवारलाई जिताउन कुनै कसर बाँकी नराखेको दाबी गरेका छन्। उनले इमान्दारपूर्वक पार्टीका लागि काम गरेको उल्लेख गर्दै आफूविरुद्ध लगाइएको आरोप आधारहीन भएको बताएका छन्।
उनका अनुसार निर्वाचन परिणामपछि बसेको समीक्षा बैठकमा उम्मेदवार प्रकाश रसाइली ले ‘विशेष स्रोतबाट अन्तरघात भएको’ भन्दै जिल्ला कमिटीमा आफ्नो नाम जबरजस्ती समावेश गराएको आरोप लगाएका छन्। महरले वास्तविकता नबुझी आफ्नो नाम सार्वजनिक गरी चरित्र हत्या गर्ने प्रयास गरिएको बताएका छन्।
यसप्रति आपत्ति जनाउँदै उनले नेपाली काँग्रेस जिल्ला कार्यसमिति बझाङलाई घटनाको निष्पक्ष छानबिन गरी सत्यतथ्य सार्वजनिक गर्न आग्रह गरेका छन्।
साथै, केही पदाधिकारीले पदको दम्भ देखाउँदै दबाब दिन खोजेको संकेत गर्दै उनले पार्टी सभापति गगन कुमार थापा समक्ष समेत ध्यानाकर्षण गराएका छन्। महरले दोषीमाथि कारबाही नभए इमान्दार कार्यकर्ताको मनोबल घट्ने चेतावनी दिएका छन्।
उनले पार्टीले समयमै उचित निर्णय नगरे इमान्दार कार्यकर्ता विस्थापित हुने अवस्था आउन सक्ने उल्लेख गर्दै केही दिन पर्खिने बताएका छन्।
उता पार्टी सभापति थापाले भने पदबाट राजिनामा दिएको समाचार आएको छ ।
